"Наполи" етакчиси "Барселона"га ўтиши мумкин

"Наполи" ҳужумчиси Лоренцо Инсинье "Барселона"нинг трансфер нишонига айланди.

Football Italia нашри тарқатган хабарга қараганда, "кўк-анор ранглилар" 30 ёшли футболчи уй клубида қийин вазиятга тушиб қолганидан фойдаланмоқчи. Неаполликлар раҳбарияти футболчи билан келишмовчиликларга дуч келди, шу сабабли у билан янги шартнома бўйича музокаралар боши берк кўчага кириб қолди.

Инсинье ортда қолган мавсум "Наполи" сафида 48 та ўйин ўтказди ва 19 гол ҳамда 11 та голли узатмага муаллифлик қилди.

Унинг клуб билан амалдаги шартномаси 2022 йил июнида тугайди. Унинг айни дамдаги трансфер нархи 48 миллион еврога баҳоланмоқда.