"Насаф" етакчилик қилаётган, "Навбаҳор" эса кира олмаган рўйхат. Суперлигамизнинг энг сермаҳсул жамоалари

Суперлигада ҳозирча 21 тур ортда қолди. Интригага бой ўтаётган мавсум бизга аввалгиларидан кўпроқ эмоцияларни тақдим этяпти. Тенг кучли 3-4 та жамоа чемпионлик учун курашаётган бўлса, қуйи поғоналарда ҳам кураш авжида. Аввалгидек турнир жадвалида жарликлар йўқ. Айни дам жадвал ҳақида сўзлаш ниятида эмасман. Чин мухлислар қайси жамоа нечанчи ўринда эканлигини ёддан билади. Келинг, Суперлигадаги айрим рақамларга назар соламиз: 

Суперлигамининг энг сермаҳсул жамоалари:

5."Сўғдиёна"

Турнир жадвалида: 5-ўрин
Урилган голлар: 27 та
Ўтказиб юборилган голлар: 22 та

Жиззахликлар жорий мавсум биринчи даврада яхши ўйинлар намойиш этиб, бир қатор чиройли ғалабаларни қўлга киритди. Бироқ... Бироқ сўнгги турларда улар қайд этаётган натижалар жуда салбий, десам адашмаган бўламан. 15-турдан сўнг 30 очко тўплашга эришган "бўрилар" қолган 6 ўйинда атиги 3 очко қўлга киритди. Дарвоқе, жиззахликлар Ўзбекистон кубогидаги юришини ярим финалда тўхтатди. "Навбаҳор"га қарши ўйинда улар кўп куч сарфлаб, якунда пенальтилар сериясида наманганликларга имкониятни бой берди. Жамоанинг асосий мақсади Суперлига турнир жадвалида кучли тўртликка кириш, наздимда. Аммо ҳозирги ҳолатидан олиб қарасак, мазкур миссияни уддалаш ҳам қийиндек, гўё.

4. АГМК

Турнир жадвалида: 6-ўрин
Урилган голлар: 29 та
Ўтказиб юборилган голлар: 19 та

АГМК жорий мавсум аввалгисидек яхши натижа кўрсата олмади. Ўтган мавсум 3-ўринни қўлга киритган клубнинг тобора кучли учликка кира олмаслиги ойдинлашиб бормоқда. Аслида, улар ҳамон ўша даражада. Бироқ рақобат уларни аяб ўтирмаяпти. Шундай бўлса-да, Миржалол Қосимов шогирдлари урилган голлар сони бўйича Суперлигамиздаги 4-жамоа бўлиб турибди. Барибир олмалиқликларда мутахассис кучли ва ўзига яраша номлар бор.

3. "Қизилқум"

Турнир жадвалида: 4-ўрин
Урилган голлар: 30 та
Ўтказиб юборилган голлар: 24 та



Комбинацион футболнинг намоёндалари ва анчагина ҳужумкор ўйин кўрсатувчи Лазаревич шогирдлари гол уриш бобида ҳам чемпионатимизнинг энг кучли жамоаларидан бири ҳисобланади. Жорий мавсумда "Қизилқум" 21 та беллашувда 30 бор рақиблар дарвозасини ишғол қилган. Жамоанинг асосий тўпурари эса Темурхўжа Абдухолиқов ҳисобланади. Олдинги чизиққа гап бўлиши мумкин эмас. Бироқ мудофаада камчиликлар бор. Агар шу муаммо тузатилса, келаси мавсум чемпионлик учун курашиб кўрса ҳам бўлади, наздимда. 

2. "Пахтакор"

Турнир жадвалида: 3-ўрин
Урилган голлар: 30 та
Ўтказиб юборилган голлар: 16 та

Ўзига ўхшамаётган "шерлар", ўзига ўхшамаса ҳам ҳар доим кучлилар қаторида. Уларнинг қулаш нуқтаси қайсидир жамоалар учун кўтарилиш демакдир. Ўтган мавсум 26 тур якунига кўра, 51 бор рақиблар дарвозасини ишғол қилган жамоа бу мавсум истаса ҳам ушбу кўрсаткични такрорлай олмаса керак. Шундай бўлса-да, улар гол уриш бўйича энг яхши иккинчи кўрсаткични қайд этмоқда. Уларда ҳамон чемпион бўлиш имконияти мавжуд. Шу билан бирга, сермаҳсуллик бўйича пешқадамдан фарқ у қадар катта эмас. 

1. "Насаф"

Турнир жадвалида: 1-ўрин
Урилган голлар: 33 та
Ўтказиб юборилган голлар: 11 та

"Аждарлар" жорий мавсум айрим паллаларда танқидларга дуч келди. Бироқ мен бунда маъно кўрмаяпман. Айни вақтда Рўзиқул Бердиев шогирдлари Суперлигада етакчи. Шунингдек, сермаҳсуллик бобида ҳам ҳозирча уларга етадигани йўқ. Шунчаки, узоқ кутилган чемпионликка бу мавсум қаршиликлар яқин келяпти. Кичкинагина қоқилиш ҳам мухлисларнинг ғазабига сабаб бўляпти, баъзан. Бу нормал ҳолат. Айтиш керакки, улар ҳозир Суперлигамизнинг энг яхши жамоаси. ОЧЛдаги муваффақиятли иштирок ҳам буни исботлай олади. Бироқ вазият тез ўзгариши мумкин. Ва ҳатто "аждарлар" энг сермаҳсул ва энг яхши жамоа бўлиб турган пайти ҳам чемпионликни қўлдан чиқариши ҳеч гап эмас. Бундай паллаларда энг муҳими - стабиллик.  

Ҳали мавсум якунланишига 5 тур бор. Қайси клуб чемпион бўлади, қай бири Суперлигани тарк этади - қолган учрашувларда билиб оламиз. Демак, сўнгги турлар ёниши ва яна ҳам сермаҳсул бўлишига ишонсак бўлади. Кўрамиз, жамоаларимиз ишонганимизни бизга тақдим эта олармикан. 

                                                                       

                                                                                                                           ХУДАЙҚУЛОВ Карим тайёрлади