"Navbahor" klubi yangi bosh murabbiyi Deyan Jurjevichning faoliyati qanday kechgan?

Deyan Jurjevich 1967 yilning 4 iyul kuni Yugoslaviyaning Lazarevats shahrida dunyoga kelgan. Ushbu murabbiy futbolchilik faoliyatida yarim himoyachi vazifasini bajargan. Futbolchilikning boshlang‘ich davrini "Kolubara" klubida o‘tqazgan. 1989 yili Belgradning OFK jamoasiga taklif qilingan va 1993 yilgacha ushbu klub a’zosi bo‘lgan. Keyin Gretsiyaga yo‘l olib, "Apollon Smirnis" klubi bilan shartnoma tuzgan. Bu jamoada 13 o‘yinda maydonga tushib, bitta gol urdi. 1994 yilning boshida ortga, Serbiyaning OFK klubiga qaytdi va 2 mavsumni shu erda o‘tqazdi. Aynan 1994-1995 yillarda Deyan Jurjevich Yugoslaviya termasida ham to‘p tepdi. 1996-1998 yillarda "Chukarichki" uchun o‘ynadi. 1998 yili yana bir bor mamlakatni tark etib, bu safar Shvetsiyaga yo‘l oldi. Shvetsiyada AIK jamoasi sharafini ikki yil davomida himoya qilgan va 1999 yili Shvetsiya kubogi g‘olibiga aylandi. 2000 yili yana bir bora orqaga qaytgan va 2002 yili OFK jamoasida faoliyatini yakunladi.

Butsasini mixga ilgan murabbiy, OFK klubiga sodiq qolgan holda, klub yoshlar jamoasida 2006 yilgacha murabbiylik qildi. 2007 yilda uni Serbiya yoshlar terma jamoasiga bosh murabbiy etib tayinlashdi. Yarim yillik faoliyatidan so‘ng, 2008 yilning o‘rtalarida "Chukarichki" klubi bosh murabbiyi bo‘ldi. Serbiyaning yuqori ligasida chempionlikka erisha olmagach, 2009 yilda iste’foga chiqdi. Shu yili OFK klubida bosh murabbiy lavozimida ish boshlagan va 2010 yili Serbiya chempionatida uchinchi o‘rinni egalladi. 2011 yili murabbiylik karerasida ilk bor boshqa mamlakatda ishladi. Bu O‘zbekistonning "Paxtakor" klubi edi.

2012 yilgacha yurtimizda faoliyat yuritgan, shu yilning oxirlarida vataniga qaytdi va Kraguevatsning "Radnichki"sida bosh murabbiy bo‘ldi. 2014-2015 yillari o‘zining ko‘p yillik faoliyatini o‘tqazgan jamoasi OFK klubida yana bosh murabbiy bo‘ldi. 2015 yilning yoz faslida Deyan yana O‘zbekistonda ish boshladi. Bu safar futbolchi yoki murabbiy sifatida emas, balki texnik direktor lavozimida. 2018 yildan beri Serbiyaning "Zemun" klubini boshqarib kelayotgan murabbiy bugun "Navbahor"da ish boshladi. Bugun esa "Navbahor" klubi bosh marubbiyi sifatida ommaga tanishtirildi.

Botir MAHKAMOV