"Навбаҳор" янги мавсумга тайёргарликни 20 декабрда бошлайди

Чемпионатнинг охирги турида ўз майдонида “Қўқон-1912” жамоасига ютқазиб қўйган “Навбаҳор” клуби қишки таътилга чиқиб кетди.

Хабарингиз бор, янги мавсумдан жамоага Самвел Бабаян бош мураббийлик қилади. Шундай экан, таркибда жиддий ўзгаришлар бўлиши шубҳасиз. Куни кеча хабар берганимиздек, Ўткир Юсупов, Даврон Ҳошимов ҳамда Боян Цигер билан шартномалар узайтирилди.

Клуб матбуот хизматининг хабарига қараганда, “Навбаҳор” жамоаси 20 декабрдан ўқув-машғулот йиғинларини бошлашни режалаштирган. Маълумотларга кўра, ҳозирда бир қатор янги ўйинчилар билан музокаралар жараёни давом этяпти. Воқеалар ривожини кузатишда давом этамиз.