"Навбаҳор" янги мавсумга йиғинни Тошкентда бошлайди

Сергей Лушчан бошчилигидаги "Навбаҳор" янги мавсум учун тайёргарлик режасини маълум қилди.

Жамоа 2025 йилдаги илк ўқув-машғулот йиғинини 6 январдан бошлашни режалаштирган. Наманганликлар мазкур санада Тошкентда йиғилиб, уч ҳафталик йиғин ўтказишади.

Машғулотлар давомида асосий эътибор футболчиларнинг жисмоний ҳолатларини тиклашга қаратилади. Йиғин давомида ўртоқлик учрашувлари ўтказиш режалаштирилмаган. Бироқ машғулотларниг сўнгги ҳафтасида ўйинчиларнинг жисмоний ҳолатларидан келиб чиққан ҳолда спарринг - рақиб танлаб, назорат-синов баҳси ўтказилиши ёки футболчилар иккига бўлинган ҳолда ўзаро ўйин ўтказишлари ҳам мумкин. 

"Навбаҳор"нинг Тошкентдаги тайёргарлик режаси якунлангач, ўқув-машғулот йиғинини БААда давом эттириш режалаштирилган.