"Navbahor"da yangi murabbiy ish boshladi, uch nafar legionerga esa javob berildi

Xabaringiz bor, “Navbahor” 2-davra bahslariga jiddiy tarzda tayyorgarlik ko‘rmoqda. Jamoaning murabbiylar shtabidan yangi mutaxassis o‘rin oldi. Bu serbiyalik mutaxassis Aleksandr Galich.

Galich 1976 yili tug‘ilgan. Futbolchi sifatida bir qator jamoalarda to‘p tepgan. Sobiq hujumchi.

Murabbiylik faoliyati davomida Serbiyaning OFK (Belgrad), “Radnichki” (Kraguevats), BAAning “Emireyts” (Ras-el-Xayma), Toshkentning “Lokomotiv” va Xitoyning “Chanchun Yatay” (Chanchun) klublarida ishlagan. 

“Lokomotiv” hamda “Chanchun Yatay” jamoalarida ayni paytda “Navbahor”da maslahatchi-murabbiy sifatida ishlayotgan Samvel Babayan bilan birga faoliyat yuritgan.

Aleksandr Galich “Navbahor”da jismoniy tayyorgarlik bo‘yicha ish olib boradi.

Serbiyalik mutaxassis “lochinlar”ning kecha kechki payt “Markaziy” o‘yingoh zaxira maydonida bo‘lib o‘tgan mashg‘ulotida Viktor Jalilov boshchiligidagi murabbiylar shtabiga yordam berdi.    

Shuningdek, “Navbahor”da bir qator mahalliy va xorijlik futbolchilar ko‘rikdan o‘tishmoqda. Jamoaga ko‘rikdan o‘tish uchun kelgan 3 nafar legioner, ya’ni, braziliyalik himoyachi Portela De Akvino Saulo, serbiyalik hamda rossiyalik hujumchilar Jelko Dimitrov va Pavel Ignatovichga javob berildi.

Ayni paytda “lochinlar” tarkibida ko‘rikdan o‘tayotgan ikki nafar  xorijlik futbolchi, ya’ni, serbiyalik himoyachi Boyan Tsiger hamda braziliyalik hujumchi Kosta Tenorio Gutiner qolishdi.

“Navbahor” PFK matbuot xizmati.