"Навбаҳор"га етадигани йўқ. "Нефтчи" мухлислари Суперлигани соғинмаган кўринади. "Насаф" - "Пахтакор" учрашуви бу борада иккинчи

5 - 7 май кунлари Суперлиганинг 7-тури ўтказилди. Натижалар билан сайтимиз орқали хабар бериб бордик.

Энди эса турга оид қизиқарли маълумотларни тақдим этмоқдамиз. Яъни анъанамизга содиқ қолган ҳолда тур мухлислари статистикаси билан таништирамиз.

Бу гал стадионларимизга жами 53544 томошабин ташриф буюрди. Ҳар бир беллашувга ўртача 7649ни ташкил қилади.

Энг кўп мухлис Наманганда. “Навбаҳор” – “Бунёдкор” баҳсини 26231 одам шоҳидига айланди. Бу ўйинга бўлган қизиқиш юқори эди. Қолаверса, клуб Ҳайит айёми муносабати билан стадионга киришни бепул қилиб қўйди. Натижада арена мухлислар билан тўлиб тошди ва бу кўрсаткич ҳозирча мавсум рекорди бўлиб турибди.

Қашқадарёда Ўзбек футболининг 110 йиллиги нишонланди. Шунингдек, "Насаф" ўз уйида "Пахтакор"ни қабул қилди. Нурсиз дуранг қайд этилган беллашувни 15500 томошабин кузатди.

Турнинг яна бир марказий қарама-қаршилиги АГМК - "Сўғдиёна" ўртасида кечди. Голларга бой беллашувни 4675 ишқибоз томоша қилди. Суперлигага чиққан ва мавсум бошида катта мақсадлар қўйган "Нефтчи"ни мухлислар ёлғизлатиб қўяётгандек. Тўғри, жамоа уй ўйинларини ўзининг стадионида эмас, балки Яйпанда ўтказмоқда. Бироқ фарғоналиклар ўз вилоятида ўйнамоқда. Мухлислар эса натижаларга монанд камайиб бормоқда...

Энг кам ишқибоз Тошкентда. "Олимпик" - "Динамо" баҳсини 383 ишқибоз шоҳиди бўлди (пойтахт жамоалари учун оддий ҳол).

Қуйида Суперлиганинг ушбу турига ташриф буюрган мухлислар статистикаси билан танишинг (мухлислар сони ПФЛ сайтидан олинди):

"Навбаҳор" - "Бунёдкор" 2:1. 26231 томошабин

"Насаф" - "Пахтакор" 0:0. 15500 томошабин

АГМК - "Сўғдиёна" 3:2. 4675 томошабин

"Металлург" - "Қизилқум" 1:1. 4512 томошабин

"Сурхон" - "Қўқон-1912" 1:0. 1297 томошабин

"Нефтчи" - "Локомотив" 0:1. 946 томошабин

"Олимпик" - "Динамо" 1:1. 383 томошабин