"Навбаҳор"га қайтиш учун "Пахтакор"дан ўз трансферимни сотиб олганман. Унинг нархи..." - Азим Аҳмедовдан жиддий гаплар

“Навбаҳор” клубининг сардори ва етакчиси, бир неча йилдан бери жамоа шарафини ҳимоя қилиб келаётган Азим Аҳмедов ҳамма вақт мухлисларнинг диққат-марказида бўлади.

Унинг “Қўқон-1912” дарвозасига стандартдан киритган голи июль ойининг энг чиройли голи бўлди. Sports.uz мухбири футболчи билан қизиқарли суҳбат уюштирди. Унда Азим Аҳмедов бир қатор масалаларда жиддий гапларни айтди.

- Азимжон, “Қўқон-1912” дарвозасига жарима зарбасидан киритган голингиз июль ойининг энг чиройли голи, деб эътироф этилди. Ўша вазиятни эсга олсак, масофа анча олис эди, зарбани шунчаки таваккал тепдингизми ёки ҳаммасини аниқ ҳисоб-китоб қилганмидингиз?

- Тўпни жарима нуқтасига қўйган пайтимда гол уришимни кўнглим сезди. Ўйиндан аввал Виктор Романович ҳам агар узоқ масофадан жарима зарбаси белгиланса, дарвоза томон тепгин, деб анча уқтирганди. Гол уришимни сезгандим ва тепган тўпим дарвоза тўридан жой олди.

- “Навбаҳор” водий дербисида муҳим ғалабани қўлга киритди. Ўйин қандай таассурот уйғотди?

- Камчиликларимиз анча кўп. Жамоамизга янги футболчилар келган. Уларни мослашиб олишига ҳам икки-учта ўйин керак. Яхши легионерларни олдик. Аммо биринчи ўйинда ўзларини кўнгилдагидек кўрсата олишмади. Лекин ҳаммасини кўрдик, билиб турибмиз, улар яхши футболчилар экан. Шундоқ ҳам қўқонликларга қарши учрашув биз учун оғир ўтишини сезгандик. Бизга фақат ғалаба керак эди. Натижа учун ўйнадик. Турдан-турга ўйинимиз яхшиланиб бораверади. Шунинг устида ишлаяпмиз.

- 12-турда Наманганда “Андижон”га қарши ўйиндаги мағлубият жамоа учун ҳам, мухлислар учун ҳам оғир қабул қилинди. Ўша учрашувдан кейин сиз ижтимоий тармоқдаги расмий саҳифангиз орқали мухлисларга рози бўласизлар, дея кетганингизга шаъма қилгандингиз. Ростдан клубни тарк этганмидингиз?

- Ўша ўйинда кўрган бўлсангиз, роса жон куйдириб ўйнадик. Гол ўтказиб юборган вазиятда Иван Соловьёв хато қилди. Мен ҳужумга кетгандим. Тўп олдириб қўйилганидан кейин ҳужумдан орқага қайтиб бордим, аммо улгурмадим. Кўпчилик эса мени айбдор қилди. Ўшанда мен ҳақимда ёмон фикрлар билдирилди. Рости, бундай гапларни эшитавериб чарчаб кетдим. Ўзимга-ўзим қарор қилдим: бўлди, жамоадан кетмасам бўлмайди! Мана шундай фикрга келгандим. Яхшими-ёмонми, бизга тош отилаверади. Ҳамма нарса жамоа сардорининг бошида синар экан. Ўшанда ўзим ҳам руҳан “синиб” қолдим. Шунинг учун кетаман деган постни қўйгандим. Лекин бунчалик шов-шув бўлишини ўйламагандим. Кейин вилоят ҳокими билан гаплашдим. Самвел Бабаян “Навбаҳор”га келгач, мени чақиртирди, гаплашдик. У менга мотивация берди. Биринчи ўйинни ютиб олсак, ҳаммаси изига тушиб кетади, деди. Худога шукр, ютдик. Хуллас, шундай қилиб, “Навбаҳор”да қоладиган бўлдим.

- Маълумотларга қараганда, олдингизда яхши таклифлар бор эди. Музокараларга киришганмидингиз?

- Ўша пайтда “Турон” билан шахсан ўзим музокара олиб бордим. Улар “Андижон” билан ўйиндан кейиноқ менга қўнғироқ қилишди. Клуб вакиллари билан яхши гаплашиб тургандик. Кейин “Навбаҳор”даги ўзгаришлардан сўнг, Наманганда қолдим.

- Самвел Бабаян келгач, “Навбаҳор”да нима ўзгарди?

- Биринчи ўринда тартиб-интизом ўзгарди. У ишга чанқоқ одам, жуда талабчан. Майда деталларгача эътибор беради ва жамоани яхши тарафга ўзгартиряпти. Муҳитни ҳам яхшилаяпти. Ҳаммани бирлаштиряпти. “Навбаҳор”ни битта оилага айлантирди. Худо хоҳласа, бунинг мевасини кўрамиз.

- Мавсум бошида вилоят ҳокими чемпионлик вазифасини қўйганди. Биринчи даврадаги омадсизликдан кейин поезд кетиб бўлдими?

- Ҳар йили чемпион бўлишни истаймиз. Битта мураббий келдими, унга 3-4 йил вақт бериш керак. Шота Арвеладзе ҳам келиб бир йилда ҳеч нима қила олмади-ку. Уч йил ичида “Пахтакор”ни ўзгартириб, совринларни ютди. Бизда мураббийларни кўп алмаштиришади. Энди бир мураббийга мослашаётганимизда у кетади ва бошқаси келади. Янгисига мослашиш жараёни бошланганида яна бошқаси келади. Энг кўп мураббий алмашгани бизда бўлса керак. Битта мураббийга етарлича вақт берилса, у жамоани чемпион қилади. Фақат ҳамма нарсага вақт керак.

- “Навбаҳор”нинг чемпионлигига неча йил керак ,деб ўйлайсиз?

- Вақти келди, менимча. Ҳозирги мураббийларга етарлича фурсат берилса, мақсадга эришамиз. Клубда ҳамма шароит етарли. Хоҳлаган ўйинчиларни олиб беришяпти. Бундан буёғига жамоани янада жипслаштиришади. Ҳар йили таркибда ўзгаришлар бўлади, 10 таси кетса, 15 таси келади. Энди ҳозирги мураббийларга вақт берилса, бунинг самарасини кўрамиз.

- Одил Аҳмедовни миллий терма жамоада бирга тўп сурганингизни кам бўлса-да, кўрганмиз. Сиз билан акангизни “Навбаҳор”да ҳам бирга кўришимиз мумкинми? Одил фаолиятини Наманганда тугатмоқчими?

- “Навбаҳор”да тугатаман, деган нияти бор эди. Кейин орада Наманганда акам тўғрисида ҳар хил гап-сўзлар бўлиб кетди. Шу боис, Хитойдан қайтганимдан сўнг, футболни тугатаман, деди. Клубга келмасимдан олдин ҳаммадан шунча гап эшитяпман, деб ҳайрон бўлди. Одамлар орасида Одил у қиляпти, бу қиляпти, қайсидир мураббийни олиб келибди, шунга ўхшаш гаплар тарқалди. Шунинг учун Хитойдан кейин фаолиятини тугатмоқчи.

- Демак, акангизни фикри ўзгарибди-да....

- Гап-сўзлар ёмон таъсир қилади. Нимагадир биз тўғримизда шундай миш-мишлар чиқаверадида.

- Нима учун шунақа?

- Ҳаёт бир текисда кетмайди. Ўйинимиз бир чиқади, бир чиқмай қолиши мумкин. Ана шундай пайтда ўзингиз истамаган ҳолда чуқурликка тушиб қолганингизда камига етмаганидек, мухлислар сизни аксинча қўллашни ўрнига яна ўша чуқурликка улоқтиришади. Ижтимоий тармоқлар орқали биз ҳақимиздаги бўлмағур гап-сўзларни жўнатишади, уни эшитасиз ва кайфиятга таъсир қилади. Тўғриси, емаган сомсага кўп пул тўлайман. Мен ҳар доим “Навбаҳор” учун жонимни бериб ўйнаб келганман. Буни билганлар билади. Мухлисларни ижтимоий тармоқда гуруҳи бор. Кимдир исбот далилсиз нимадир деса ҳамма ўшани гапига қараб эргашиб кетади. Энди уларнинг гапларига парво қилмай қўйдим. Акс ҳолда соғлиққа анча зарар қиларкан.

- Барибир Одил Аҳмедовни укаси бўлганингиз учун сизга ҳам бошқача эътибор берилади. “Пахтакор”га кетган пайтингизда кейинчалик акангизга ўхшаб хорижда тўп суришингизни кутдик.

- Худога шукр, таклифлар кўп бўлган, ҳозир ҳам бўлиб турибди. Агар шу ҳақда нимадир десам, яна гап-сўз кўпаяди. Одамлар мендан худди Одил Аҳмедовнинг ўйинини кутишади. Укаси бўлганим учун ҳам унинг каби ўйнашимни хоҳлашади. Одил Аҳмедовда Худо томонидан берилган талант бор. Мен акамга ҳавас қилиб футболчи бўлганман. Лекин менинг ўйин услубим бошқача, акамники бошқача. Ака-ука дегани бир хил ўйнайди, дегани эмас-да. Тўғриси, Одил акамдаги иқтидор – бу туғма талант. Тўғри, мен ҳам акамга ҳавас қилиб, унга интилиб ўйнашга ҳаракат қиляпман. Билмадим, негадир Одил Аҳмедовни укаси бўлганим учунми, мени кўпчилик танқид қилаверади. Боя айтдим-ку, Одил акам билан бир хил ўйинни кутадилар. Лекин унақамас-да, ҳаммани ўйин услуби ҳар хил. Энди четдаги таклифларга келсак, “Пахтакор”да ўйнаб юрган пайтимда ҳам кўплаб чақирувлар бўлган, Қатардан ва яна бошқа жойлардан. Лекин Одил акам менга, Наманганга бориб ёрдам бер, мен шунча йилдан бери хорижда ўйнаяпман, ота-онамизни ёнида бўлгин, уйда ўйнагин, деган. Биласизми, “Навбаҳор”га қайтиб ёрдам бериш учун, наманганлик мухлислар олдида тўп суриш мақсадида чўнтагимдан пул сарфлаб, “Пахтакор”дан трансферимни сотиб олганман. “Навбаҳор”га шунча машаққат билан келган бўлсам ҳам барибир ишқибозлар танқид қилаверадилар. Агар менга пул керак бўлганида “Пахтакор”дан ўзимни-ўзим сотиб олиб, бу ерга келмаган бўлардим-ку. Ўша сарфлаган пулимга бемалол бошқа бирор-бир бизнес қилсам ҳам бўларди.

- “Пахтакор”дан трансферингизни қанчага сотиб олгансиз?

- 800 миллион сўмга сотиб олганман. Ҳамма пулни ўзимиз тўлаганмиз. “Навбаҳор” ўзимнинг жамоам бўлгани учун жон куйдириб, ҳар томонлама ёрдам бергим келган. Аммо битта мағлубият ёки ўйинимиз қовушмай қолса, яна биз ёмон бўлиб қолаверамиз. Кейин рақамларимни, инстраграмдаги саҳифаларимни ўзгартириб юбордим. Турли гапларни эшитавериб чарчаб кетгандим.  

- Одил Аҳмедовни укаси бўлиш қийин эканми?

- Буни қийин ва хурсандчилик томонлари бор. Мана шундай инсоннинг укаси бўлганимдан фахрланаман. Аммо бу Одилнинг укаси, шунинг учун уни ҳурматидан терма жамоага чақиряпти, акаси туфайли ўйнатяпти, акаси айтиб қўйган, деган бўлмағур гап-сўзларни гапиришади. Одил акам менинг ўрнимга тушиб, ўйнаб бермайди-ку! Яқинда миллий терма жамоамизда иккита ўйинда ўйнадим, кўпчиликда яхши таассурот қолди. Аммо одамларни оғзига элак тутиб бўлмайди.

- Четдан тушган таклифларни қабул қилмаганингиз туфайли аттанг қилиб қолган пайтларингиз бўлганми?

- Жуда кўп афсусланганман. Йиғилишларда мени шарманда ҳам қилишган. Ахир ўзингиз ўйланг, қайси одам шунча пулга ўзини сотиб олиб, бу ерда ўйнайди?! “Навбаҳор”га мухлислар учун келганман. Пул учун бўлганида аллақачон четга кетган бўлардим. Жамоага жонимни бераман, деб келганман. Бундай йўл билан келиш ҳеч қайси футболчини қўлидан келмайди, буни тан олиш керак. Аммо буни тушунишмайди, ҳайрон қоламан. Менга алам қилади.

- Клубдаги ҳозирги вазиятдан кейин сизда ишонч ва умид уйғондими?

- Бизга биргина ғалаба керак эди. Гол уриб олганимдан ҳам хурсанд бўлдим. Энди кейинги ўйинларда ҳам яхшилаб ҳаракат қиламиз. Аммо ҳаёт бир текисда кетмайди, паст-баландликлардан иборат.

- Ўйинлар яна мухлисларсиз ўтказиляпти. Бу ҳолат айнан “Навбаҳор” футболчиларига қандай туюляпти: стадион тўла ишқибозлар қаршисида ўйнаган яхшими ёки бўм-бўш трибуналар қаршисида босимсиз тўп сурган қулай эканми?

- Футбол томошабинлар билан бўлса мароқли бўлади. Ўз уйимизда мухлисларимиз билан ҳам ютиб оламиз. Аммо “Андижон” билан учрашувда ўйинимиз қовушмади. Негадир шу “Андижон” билан Наманганда ўйнасак, ҳар йили ўйинимиз яхши чиқмай қолади. Бу сафар ҳам мухлисларимиз хафа бўлишмасин, уларни хурсанд қилайлик, деб олдинга ўтишга шошилдик, трибунадан гол ур, деган овозлар эшитиляпти, шунга яраша ҳаракат қилдик, аммо ўхшамади. Мухлислар стадионда бўлмаса, худди барака йўқдек туюлади. Агар сафарда “Қўқон-1912” билан учрашувда стадионга ишқибозлар қўйилганида бизни мухлисларимиз кўп бўларди. Барибир томошабинлар қаршисида тўп суриш бошқача.

- Футболдан кейинги режангиз қандай?

- Ҳали бу ҳақда ўйламадим. Футболдан кейин бошқа иш қиламан, менимча, футболга бошқа қайтмасам керак. Футболда барибир қийин, мураббийларни ҳам кўряпман. Фаолиятимни тугатгач, бирор-бир иш қиларман. Лекин ҳозир фақат футболга эътиборимни қаратганман.

- Фаолиятингизни “Навбаҳор”да тугатасизми?

- Ҳозир музокаралар бўляпти. У ер, бу ердан агентлар ҳам ёзиб туришибди. Чемпионат тугасин-чи, кўрамиз.