“Навбаҳор”нинг Туркиядаги ўйини нега бекор қилинди?

Ўзбекистон чемпионатининг янги мавсумига Туркияда тайёргарлик кўраётган Наманганинг “Навбаҳор” жамоаси 12 февраль куни Россия Премьер-лигаси вакили “Балтика” билан  ўртоқлик учрашуви ўтказиши белгиланган эди.

Белек шаҳрида ноқулай об-ҳаво шароити ҳукм сураётгани боис бу учрашув ўтказилмайдиган бўлди.

Буни “Балтика” клуби матбуот хизмати ҳам тасдиқлади.

- Ҳурматли мухлислар! Анталья соҳилларини бугун эрталаб қамраб олган кучли ёмғир сабаб Ўзбекистоннинг “Навбаҳор” жамоасига қарши назорат ўйини бекор қилинди. “Факел” билан спарринг ўйини ўтказилиши ҳақида қўшимча равишда хабар берамиз.

Етказилган ноқулайликлар учун узр сўраймиз!, - дейилади “Балтика” клубининг баёнотида.

Айни пайтда “Балтика” Россия чемпионати турнир жадвалида бешинчи ўринни эгаллаб турибди. Жамоа 18 та ўйинда 35 очко тўплаган. Биринчи ўринда 40 очко билан “Краснодар” жойлашган.

“Навбаҳор” эса, Ўзбекистон чемпионатининг 2025 йилги мавсумини еттинчи ўринда якунлади. Наманганликлар 30 та ўйинда иштирок этиб, 40 очко жамғарган. Мамлакат чемпионлиги 64 балл тўплаган “Нефтчи”га насиб қилди.