"Нефтчи" бош мураббийи ғалабадан сўнг нима деди?

“Нефтчи”нинг “Заря”га (1:0) қарши учрашувидан кейин фарғоналиклар бош мураббийи Виталий Левченко ўз фикрлари билан ўртоқлашди.

"Учрашув жанговар руҳда кечди. Украина жамоалари асосан атлетик ва жисмонан кучли футбол намойиш этиш тарафдорлари. Шунинг учун рақибимиз прессинг қўллаб, кучли босим ўтказганда, унга қарши чора топа олганимиздан қониқиш ҳосил қилдим.

Ўз навбатида "Заря" жамоасида фаолият юритаётган нидерландиялик мутахассиснинг малакаси ҳам бугунги ўйинда билинди. Шуниси қувонарлики, ўйинда стандарт вазиятдан гол киритдик. Чунки машғулотларда ушбу жараён устида доимо иш олиб боряпмиз ва бу ишлар амалда ҳам ўз исботини топди.

Юклама ва кўрсатмаларни бажаришда футболчиларнинг ёндашуви ҳам алоҳида таҳсинга лойиқ. Умумий қилиб айтганда, режа асосида тайёргарлик давом эттирилади, олдимизда эса бизни яна иккита спарринг кутмоқда”, - деди бош мураббий, клуб матбуот хизматига.