"Нефтчи" легионери учун мавсум тугади! Сербиялик футболчи клубдаги тақдири ва Мўминжоновнинг айтган гапига жавоб қайтарди

“Нефтчи” жамоаси ўйинидаги инқироз туфайли клуб аутсайдер бўлиб қолмоқда. Аммо Суперлиганинг 9-турида фарғоналиклар водий дербисида “Навбаҳор”га қарши учрашувда мардонавор курашишди ва бир очкони қўлга киритди.

Аммо тез орада “Нефтчи”да ўзгаришлар бўлади. Бу ҳақида бош мураббий учрашувдан кейинги матбуот анжуманида айтди. Айниқса, таркибдаги легионерларнинг хизматидан бошқа фойдаланмасликни айтиб, бу борада сербиялик футболчи Даниэль Стойковичнинг номини ҳам қўшиб ўтди.

Мавсум аввалида таклиф этилган 32 ёшли ҳимоячи айни пайтда “Нефтчи” билан бирга эмас. Суперлигада 6 та, Ўзбекистон кубогида 3 та ўйинда майдонга тушди. Куни кеча Sports.uz мухбири Стойкович билан боғланди.

- “Нефтчи” бош мураббийи Илҳом Мўминжонов “Навбаҳор”га қарши ўйиндан кейин легионерлар билан хайрлашмоқчилигини айтди ва уларнинг орасида сизнинг ҳам номингизни тилга олиб ўтди. Ўзи, нима бўлди?

- Рости, мен бу хусусида ҳеч нима билмайман. Мен ҳали ушбу масалада клубдаги ҳеч ким билан гаплашмадим.

- Аслида “Нефтчи” клуби нима учун мавсумни яхши ўтказа олмаяпти? Бунга нима сабаб бўляпти?

- Эҳтимол, яхши ўйнай олмагандирмиз. Бироқ бунинг асосий сабабини билмайман. Ҳолбуки, жамоадаги барча футболчилар юқори даражали.

- “Нефтчи”нинг муваффақиятсиз ўйинлари унинг мухлисларига ёқмаётгани табиий ҳолат. Бундай пайтда эса,  бош мураббийнинг истеъфосини кутаётганлар кўп. Нима деб ўйлайсиз, мураббий ўзгариши вазиятнинг ечими учун хизмат қила оладими?

- Бундай масалаларни ҳал қиладиган одамлар бор. Футболчи сифатида биз фақат шуғулланишимиз ва майдонда югуришимиз керак. Шундай экан, бундай саволга жавоб бера олмайман.

- Лекин мавжуд вазиятдан чиқиб кетиш учун бошқа йўлни танлашганга ўхшайди. Бош мураббий ўз жойида қолиб, унинг ёрдамчилари ва легионерларга жавоб берилаётганини очиқ айтди. Нима деб ўйлайсиз, бу энг тўғри йўлми?

- Боя айтганимдек, легионерлар ва ёрдамчиларни жамоани тарк этишаётганидан хабарим йўқ. Айни пайтда мен Сербиядаман ва шу боис ҳеч нимадан хабардор эмасман.

- Умуман олганда, жамоадаги ички муҳит қандай эди?

- Бу ерда футболчилар бир-бирини жуда ҳурмат қилади, деб ўйлайман. Шунчаки, яхши натижа қайд этиш учун нимадир етишмаяпти.

- Адашмасам, бошида кетма-кет 6 та турда майдонга тушдингиз. Кейинги 3 та ўйинда кўринмадингиз, ҳатто захира ўриндиғида ҳам. Нима бўлди?

- 30 апрель куни “Динамо”га қарши учрашувда футболчи учун энг оғир бўлган жароҳатни олдим. Йил охирига қадар майдонга туша олмайман. Тизза олди хочсимон суюкларимни жароҳатлаб олдим. Энди Сербияда жарроҳлик амалиётини кутяпман.

- У ҳолда кейинги режаларингиз қандай? Масалан, “Нефтчи”да сизга нима ёқди ва нима ёқмади?

- Яна машғулотларда тўлақонли шуғулланишим учун менга энг асосийси, яхшилаб даволаниш муҳим, қолганини кейин кўрамиз. Мени “Нефтчи” билан амалда шартномам бор. “Нефтчи” яхши жамоа. Умид қиламанки, клуб яхши натижаларни қайд эта олади.