"Нефтчи" уч нафар футболчисидан воз кечди

Якунига етган чемпионатда 9-ўринни банд қилган “Нефтчи” таркибида янги мавсум олдидан ўзгаришлар бўлиши муқаррар. Ҳозирданоқ бу борада ишлар бошлаб юборилган.

Яқинда “Навбаҳор”ни тарк этган Нурилло Тўхтасинов фарғоналиклар билан шартнома имзолагани ҳақида хабар берганмиз. Шу билан бирга клубни уч нафар футболчи тарк этгани аён бўлди. Бу ҳақида “Нефтчи” устози Виталий Левченко Sports.uz журналисти Шуҳратбек Жўраевга маълум қилган.

Жумладан, россиялик посбон Евгений Конюхов, сербиялик ҳимоячи Дарко Станоевич ҳамда ярим ҳимоячи Саломат Қуттибоев “Нефтчи” билан хайрлашган. Шундоқ ҳам икки легионер, айниқса, Дарко кўп вақтини захирада ўтказди. Мавсумнинг иккинчи ярмида қўшилган Қуттибоев ҳам афтидан мураббийлар кутган ўйинни кўрсата олмаган кўринади.

Маълумот учун, Конюхов “Нефтчи” сафида 8 та, Станоевич 13 та ва Қуттибоев 9 та учрашувда майдонга тушган.