Неймар бўлмаса бошқаси. Мессига “шерик” бор

“Барса”даги молиявий аҳвол ҳар бир трансферга жиддий ёндашишни талаб этади. Энди эса жамоа харид қилмоқчи бўлган футболчи ҳақида гаплашамиз.

Луис бор бўлса, нега яна ҳужумчи керак?

Луис Суарес майдонга қайтгач, ўзининг энг юқори даражасини намойиш этади. Жуда кўплаб голлар айнан Суарес иштирокида урилади. Фақатгина унинг ёши борасида муаммони айтмасак, ҳозирча Луисни ҳисобдан чиқариш вақти эмас.

Лионель Месси Бартомеу билан бўлиб ўтган суҳбатда, иккита фамилия – Лаутаро Мартинес ва Неймарларни айтиб ўтган. Шундан сўнг, агарда Неймар жамоага олиб келинмаса, Месси кетиши мумкин деган миш-мишлар кўпайиб кетди.

Бошқа хабарларга кўра, “Барселона” ҳам бошқа жамоалар сингари пандемия ва карантин сабаб анча пул йўқотади ва футболчилардан бирини танлашга тўғри келади. Исталган ҳужумчи билан, хоҳ у Обамеянг бўлсин, хоҳ Лаутаро бўлсин, хоҳ Мбаппе, фақат биттаси билан шартнома борасида келиша олади. 

Агарда Неймар жамоага қайтарилса, катта эҳтимол билан Гризманн сотиб юборилиши мумкин. Иккаласини бир вақтда майдонда кўриш жуда мушкул иш. Ҳозир эса жарима майдони ичидаги ҳужумчи муаммоси актуал мавзу бўлиб турибди. Суаресга ўринбосар эмас, рақобатчи ҳужумчи керак.

“Барселона” катта бартерга тайёрми?

Бартомеу футбол оламида айёр ва ақл билан иш кўрадиган президент эмаслигини ҳамма билиб бўлди. Нашрлар ёзишича, Бартомеу Лаутаро Мартинес учун “Интер” белгилаб қўйган 111 млн евро эмас, ундан камроқ пул таклиф қилмоқчи.

Бу хато. Биринчидан, ҳеч қайси раҳбар бундай режа қилаётганини ошкор қилмайди. Иккинчидан, 22 ёшли футболчи трансфер бозорида энг талабгор футболчилардан бири бўлади. Гранд жамоалар уни ўз сафига қўшиб олиш учун ҳаракат қилади. Учинчидан, Бартомеу Коутиньо, Дембеле каби футболчиларга жуда катта пул сарфлаган, улар эса бу пулларни оқлаганлари йўқ. Энди Лаутарога келганда пулни иқтисод қилиш, аҳмоқлик бўлади.

Бартомеуда иккала футболчини сотиб олиш учун яхши имконият мавжуд. Парижликлар Неймарни 144 млн еврога қўйиб юборишга тайёр. Ёки Гризманн Парижга кетиб, Неймар Каталонияга олиб келиниши ҳам мумкин. Албатта, француз футболчиси Ватанига қайтишни истаса. Лаутарони сотиб олиш эса янада осонроқ бўлади, чунки “Барселона”да “Интер” қизиқиши мумкин бўлган футболчилар бисёр.

Айтишларига қараганда, Конте биринчи навбатда Артуро вариантини кўриб чиқмоқда. Хулоса қилишга шошилмаслик керак, бу миланликлар Артуро Видални харид қилади дегани эмас. Яқиндагина ижтимоий тармоқларда Артуро Видал бошлаб берган ўзига хос челленжга биринчи бўлиб Месси жавоб берди. Ундан олдинроқ эса Лео Артуро унинг энг яхши дўстларидан бири эканлигини таъкидлаб ўтди. Агар Артуро Месси билан дўстлашган бўлса, катта эҳтимол билан Сетьен футболчини жамоада олиб қолади. Унинг ўрнига Артур ёки Ракитичлардан воз кечиш эҳтимоли бор.

 “Интер” Лаутаро учун нафақат Артур ёки Видални, балки Семедуни ҳам сўраши мумкин. Жамоа янги футболчи олиши учун фойдаси тегмаётган ўнг қанот ҳимоячиси кетгани маъқулроқ ҳисобланади. Дани Алвеш кетганидан сўнг, унинг ўрнига муносиб ўнг қанот ҳимоячиси топилмади. Балки Семедунинг кетиши бу позиция бўйича ҳам раҳбарият янада чуқурроқ ўйлаб кўришига туртки бўлар. Ҳали Коутиньо ва Дембеленинг келажаги ҳам номаълум. Усмонга белгиланган нарх туфайли, уни сотиш нореал иш. Аммо бразилиялик футболчи АПЛнинг бир қанча жамоалари қизиқиш билдиряпти.

Маълумотларга таянадиган бўлсак, “Барселона” иккала харидни ҳам амалга оширишга тайёрланяпти. Неймар Париждан, Лаутаро Мартинес Миландан олиб келинади. Агарда иккала трансфер ҳам амалга ошса, “Барселона” ҳужум чизиғи яна дахшатли кўриниш олади. Ёки Лео орқароққа ўтиб, ҳужумкор ярим ҳимоячи позитциясида ўйнаши, Де Йонг эса Бускетс билан бир чизиқда тўп суриши ҳам мумкин. Шунда ҳужумда Неймар, Суарес ва Лаутаро учлигини кўришимиз мумкин. Кўриб турганингиздек, исталган услубда ўйнаш учун кимнидир қурбон қилиш керак.

Лаутаро Мартинес Мессига муносиб шерик бўла оладими?

Жуда кўп ҳужумчилар Лео Месси билан ўйнаганда қийинчиликка дуч келишади. Масалан, Игуаин терма жамоада умуман ўзини кўрсата олмади. Лео билан қалин дўст бўлишига қарамасдан, Агуеро ҳам негадир терма жамоада ўзини кўрсата олмайди. Мауро Икарди Месси билан жуда ажойиб тандемни ҳосил қилиши мумкин бўлган ҳужумчилардан бири ҳисобланади. Афсуски, иккала аргентиналик футболчилар бир-бири билан келиша олмайди.

“Барселона”да Ибрагимович ҳам, Анри ва Вилла ҳам “кичкина диктатор” билан келишиб ўйнаш кераклигини тушуниб етишган. Алексис Санчес ҳам ҳужумда эффектив тарзда ҳаракат қила олмади. Айнан чилилик футболчи ҳозир Лаутаро “Интер”да қандай позитцияда бўлса, “Удинезе”да худди шундай позитцияда тўп сурар эди, яъни ҳужумчи бўлмаган ҳужумчи. Бутун фаолияти давомида Месси фақатгина Суарес билан келишиб ўйнай олди.

“Барселона” яна аввалгидек қудратли бўлиши учун ҳужум чизиғини кучайтириш зарур. Месси “қария” футболчиларни сотиб олишга қарши бўлиши мумкин. Масалан, Обамеянгни. Балки Обамеянг Лаутаронинг ўрнини босиш учун “Интер”га ўтар. Катта эҳтимол билан Мартинес “Барселона”га олиб келинади.

Месси интерьвюларидан бирида айнан Неймар ва Лаутаронинг жамоага келишини истаётгани ҳақида гапирган. Суарез ёш аргентиналик футболчига ўз тажрибасини улашишини ҳам айтиб ўтган.

111 млн Мартинесга, 144 млн Неймарга тўлаш керак бўлган пуллар ҳақида эса ҳеч ким бош қотиргани йўқ. Балки, Гризманн, Коутиньо ва Дембелелар сотиб юборилиб, бу пуллар тўпланар. Шундоқ ҳам улар таркибда ўз ўрнини топа олишмаяпти.

Лаутаро келса, Сетьен иккита ҳужумчи билан ўйнаш варианти ҳам мавжуд бўлади. Олдинда Мартинес ва Суарес, сал орқароқда Лео Месси. Неймар эса чапроқда тўп суради. Шунда ҳам ўнг қанот учун муносиб футболчига эҳтиёж сезилади.

Месси ҳам Мартинесга тўхталиб ўтдими, ёзда уни “Барселона”да кутамиз. Почеттино ҳам Лаутаронинг истеъдодига шубҳа қилмаётганини билдирди. “Лаутаро Мартинес яна 3-4 йилдан сўнг бунданда кучлироқ футболчига айланади” – деди аргентиналик мутахассис. “Барселона” эса бундай истеъдодни қўлдан чиқармаслиги керак.