Неймар 6 ўйинга четлатилиши мумкин
«Сантос» ҳужумчиси Неймар «Баия»га қарши ўйинда оғзини қўли билан беркитгани учун қизил карточка олиб, олти ўйингача дисквалификация қилиниши мумкин.
«Сантос» жамоасининг етакчи ҳужумчиси Неймар Бразилия чемпионати доирасида «Баия»га қарши ўтказилган сўнгги ўйинда майдондан четлатилди. Беллашув 1:1 ҳисоби билан якунланди.
34 ёшли форвард рақиб футболчиси билан тортишув пайтида оғзини қўли билан беркитгани учун тўғридан-тўғри қизил карточка олди. Қоидаларга кўра, бу ҳаракат Неймар учун олти ўйингача дисквалификацияга сабаб бўлиши мумкин. Яқин кунларда ўтказиладиган интизомий йиғилишда унга нисбатан якуний қарор қабул қилинади.
Неймар жорий мавсумда Бразилия чемпионатида «Сантос» таркибида 15 та учрашувда майдонга тушди. У шу вақт ичида саккизта гол урди, шулардан тўрттаси пенальтидан, шунингдек, учта голли узатма муаллифи бўлди.
Изоҳлар (0)