Неймарнинг “Реал”га ўтмасдан иложи йўқми?

Бразилия медиа хўжайинлари 1 Лиганинг ТВ хуқуқларини сотиб олишга қарши чиқишди, балким улар ҳамюрти Испанияга қайтишига ишонишаётгандир? Эҳтимол бу ҳақиқатга айланар... Шамол бўлмаса дарахтнинг учи қимирламайди, дейишган.

“ПСЖ”нинг гол машинаси Неймар қийин вазиятда. У 1 Лигада бир қанча рекордларни янгилаши мумкин. Аммо футбол дунёси наздида “Барселона”нинг собиқ ҳужумчиси ўсишдан кўра пастга қараб шўнғимоқда.

У “Парк де Прэнс”га 222 миллион евро эвазига келиб қўшилганидан бери тинмай голлар урмоқда. Ўзининг янги клубидаги дастлабки мавсумида барча мусобақаларда жами 28 гол уришга эришди ва бу борада Европадаги учинчи натижани қайд этди. Февралда унинг жароҳат олиб анча муддат майдондан ташқарида қолган бўлишига қарамай ундан бундай самарадорликни кутиш қийин эди.

Янги мавсумда аллақачон икки гол уришга муваффақ бўлган Неймар 2017-18-йилги мавсумдагидек самарадорликни кўрсатиши мумкин. Муаммо Неймарнинг майдондаги спорт формаси эмас, аксинча “ПСЖ” у ўйлаганчалик бўлиб чиқмаганида.

Ўзининг ватанида ўсмирлик чоғида “Сантос”да кўрсатган ўйинлари эвазига ярим-худогача айланган футболчига бефарқлик кучаймоқда дейишимиз мумкин.

1 Лига мавсуми Бразилия Тв ларида намойиш қилинмайди, бу эса мухлисларни қаҳрамонининг жасоратлари ҳақида ҳеч нарса билмасдан қолиб кетишига олиб келади.

Франциянинг топ жамоасини Европада писанд қилишмаётган бўлсада, миллий чемпионатда барча рақибларни осонлик билан “ер тишлатмоқда”.

Фақатгина Чемпионлар Лигасида бош соврини уларнинг режасидагидек амалга ошмаяпти. Бу эса истеъдодли ҳужумчининг иқтидорини шубҳа остига қўймоқда.

Бундан ташқари “муҳаббат шаҳри”да Неймар ўз мақомини барчага сингдиришда муаммога учрамоқда.

Эндигина Жаҳон Чемпионига айланган ёш “юлдузча” Килиан Мбаппе нафақат Неймарга таҳдид туғдирмоқда, балки Роналду ва Мессиларга қарши “Олтин тўп” учун курашга ёриб кирмоқда. Ҳозирда кўпчилик айнан франциялик ёш иқтидор эгаси сўнгги ўн йилликнинг қўшҳокимларини “тахтдан тушириш”га қодирлигига ишонмоқда. Яқин келажакда эса “Парк де Прэнс”нинг суюклисига айланиши Неймарнинг мақомига раҳна солиши мумкин.

Мбаппе Франция футболининг “тилла бола”си, унинг жамоадоши нархи ва иқтидори дебют мавсумида унга ҳеч қандай таъсир қилгани йўқ.

Узоқ вақт “Камп Ноу”да Мессининг соясида қолиб кетган Неймар энди янги клубида ёш юлдузчанинг соясида қолиб кетиш хавфи кўндаланг турибди.

Шу ерда у учун бошқа йўл очилмоқда. “Реал Мадрид” ушбу ёзда икки қаҳрамони билан хайрлашгач, янги қаҳрамонга жудаям муҳтож.

УЕФА Суперкубогида “Атлетико”дан учралган мағлубият Зинедин Зидан ва Криштиану Роналдуларнинг йўқлиги жамоага жиддий таъсир қилганини исботлади. Перес эса янги Галактика тузиш вақти келганини тушуниб етди.

Неймарнинг “Сантьяго Бернабеу”га олиб келиниши клуб мухлисларининг хавотирини пасайтирган бўларди, футболчининг ўзи эса бошлаган ишини охирига етказиш учун ажойиб имконият тақдим этиларди.

Бундай трансферни амалга ошириш мантиқан осон бўлмайди. Ўтган ёзда жаҳон трансфери рекорди янгиланган эди. Бир йил ўтиб уни ортга қайтариш яна янги трансфер рекордини ўрнатиш керак бўлади. Парижликлар ўз етакчисидан фақатгина 300 миллион евро эвазига ажралиши мумкинлигини айтмоқда. Мадридликлар эса футболчига ақл бовар қилмас маош – ҳафтасига 700 минг евро таклиф қилмоқда.

Неймар эҳтимол бу мавсумда ҳам келаси мавсумда ҳам “Реал”га ўтмаслиги мумкин. Бироқ у бир кун келиб албатта “оқ либос”да ўйнашини кўрсак керак.

Эркинжон Ғайбуллаев тайёрлади.