Ниҳоят, бугун 2-давра бошланади! Шацкихнинг дебюти, Қаршидаги "олишув", водий дербиси. Мутахассис муносабати қандай?

Ниҳоят, ёзги тайёргарликдан кейин Суперлига карвони яна ўз йўлида давом этишни бошлайди. 1 август санасидан иккинчи даврага старт берилади.

Бу ёғи энди ҳал қилувчи паллага айланади. 14-турданоқ жиддий қарама-қаршиликлар кутиб турибди. Яқин ўтмишнинг моҳир ҳужумчиларидан бири саналган Бахтиёр Ҳамидуллаев тур олдидан жуфтликлар бўйича ўз муносабатини билдирди.

1 август

“Сурхон” – “Олимпик”

- Яхши ўйин бўлади. “Сурхон” ҳам, “Олимпик” ҳам ғалаба учун курашиши аниқ. Лекин билишимча, “Сурхон” ҳамон ўз майдонида ўйнамаяпти. Менинг фикримча, бу жуфтликда “Олимпик”нинг имконияти бироз юқорироқдек туюляпти. Чунки бу жамоага уйдами, сафардами фарқи бўлмаяпти. Кўп клубларга жиддий муаммо туғдиряпти. “Сурхон”га осон бўлмайди.

олимпик1_1

“Пахтакор” – “Динамо”

- “Пахтакор” клуби иккинчи даврага таркибини яна кучайтирди. Бу Максим Шацкихнинг бош мураббийликдаги дебюти. “Динамо” биринчи даврада яхши қатнаша олмади. Уларни Тошкентда оғир ўйин кутяпти. “Пахтакор” фаворит. Тўғри, “Динамо” ҳам таркибига янги футболчиларни қўшди. Бироқ “Пахтакор” ҳам таркибини анча кучайтирди. Шунинг учун мезбонларда имконият катта. Лекин у қадар катта ҳисоб қайд этилмаса керак.

“Сўғдиёна” – “Бунёдкор”

- Тошкентда мураббийлик модулига ўқиб юрган пайтимда “Бунёдкор”даги шогирдларим билан кўришдим. Чемпионатга яхши тайёрланишди. “Сўғдиёна” биринчи давранинг охирги турида ўз уйида “Қизилқум”га йирик ҳисобда ютқазиб қўйгани ёдимизда. Агар ҳали ҳам ўша мағлубиятнинг салбий таъсири йўқолмаган бўлса у ҳолда мезбонларга яна қийинчиликлар туғилади. Ўйлашимча, иккала жамоанинг кучи тенг келса керак.

2 август

“Қўқон-1912” – “Нефтчи”

- Водий дербисига қизиқиш доимгидек катта. Билишимча, “Қўқон-1912” жамоаси ёзги селекцияда фақат иккита ўйинчи олди. Аниқроғи собиқ футболчиларини қайтаришди. “Нефтчи” эса ўз сафига кўпроқ янги футболчиларни қўшиб олди. Бу ҳам муҳим омиллардан бири. Ўз фикримни айтадиган бўлсам, “Нефтчи”да имконият кўпроқдек туюлмоқда.

нефтчи янги

“Насаф” – “Навбаҳор”

- Мана бу турнинг марказий ўйини. Зўр тўқнашувга гувоҳ бўламиз. Иккала жамоани ҳам биламиз. “Насаф” ҳатто ўзидан ҳам кучли! “Навбаҳор” ҳам яхши трансферларни амалга оширди. Рости, кимнидир имкониятини юқори баҳолаш қийин. Чунки “Насаф” ҳам, “Навбаҳор” ҳам кучли жамоалар. Балки дуранг бўлар.

3 август

АГМК – “Металлург”

- Очиғи, “Металлург” бўйича менда маълумотлар кам. АГМКни эса қандай жамоа эканлигини яхши биламиз. Бу учрашувда мезбонларнинг қўли баланд келади, деб ўйлаяпман. Таркиби ҳам яхши. Боз устига АГМКнинг мақсади совринли ўринлардан бирини эгаллаш.

мета

“Локомотив” – “Қизилқум”

- “Қизилқум” биринчи даврани охирги турида “Сўғдиёна”ни йирик ҳисобда ютди. Менимча, жамоада ўша ғалабанинг кайфияти тарк этмагандир. Агар шундай бўлса, “Қизилқум” яна ғалаба қозониши мумкин. Бу жамоани таркибида яхши савиядаги футболчилар бор. “Локомотив”га нисбатан “Қизилқум”да имконият яхшироқ, назаримда.

 

Фикрлар

Фикр қолдириш учун авторизациядан ўтинг!