Ниҳоят, Файзуллаев мухлислар ва мутахассисларга мурожаат йўллади

Аббосбек Файзуллаев якунланган 2023 йилда Ўзбекистон ва Россия футболининг ҳақиқий қаҳрамонларидан бўлди.

Янги йил арафасида ўзбек легионери яна бир индивидуал соврин соҳибига айланди. Футбол мухлислари ва мутахассислари мавсумнинг биринчи қисмида ЦСКА футболчилари орасида энг зўрини аниқлаш мақсадида ўтказилган сўровномада Аббосбек Файзуллаев катта устунлик билан биринчи ўринни эгаллади.

Сўровномадаги овозлар ҳисоб-китобига кўра, 20 ёшли ҳужумкор футболчимиз ЦСКАнинг узоқ йиллик сардори Игорь Акинфеев ва тажрибали ҳужумчи Фёдор Чаловни ортда қолдирди.

Аббосбек Файзуллаев ушбу хушхабардан сўнг, мухлису мутахассисларга мурожаат йўллади.

- Ассалому алайкум. Менга овоз берганларнинг ҳаммасига катта раҳмат. Бу жуда ёқимли бўлди. Бундан кейин ҳам ўз ўйинларим билан сизларни хурсанд қилиш учун бор кучим билан ҳаракат қиламан.

Барчангизни янги йил билан қутлайман, дўстлар, - деди Аббосбек Файзуллаев.

“Пахтакор” тарбияланувчиси ҳисобланган Аббосбек Файзуллаев ЦСКАга кўчиб ўтганидан бери Росся Премьер-лигаси ва мамлакат кубогида 18 та учрашувда майдонга тушиб, иккита гол ва тўққизта ассист муаллифи бўлди.

Ўзбек футболчисининг юқори савиядаги ўйинлари ҳамон мутахассислар томонидан муҳокама қилинмоқда.

Вазиятдан фойдаланиб, Sports.uz портали ўзбекистонлик футбол ишқибозлари эътиборига россиялик экспертларнинг Аббос ҳақидаги фикрларини ҳавола қилишни давом эттиради.   

Максим Деменко, “Спартак” ва “Краснодар” собиқ футболчиси:

Мавсумнинг кашфиёти сифатида кимни эътироф этиш керак? Агар клублар ҳақида гапирсак, бу “Краснодар”. Чунки жамоа биринчи ўринда кетяпти ва мавсум охирида чемпион бўлиши мумкин. Футболчиларга тўхталсак, мен Аббосбек Файзуллаевни танлаган бўлардим.

Бу йигит қисқа фурсатда ЦСКАнинг етакчи ўйинчисига айланди, у катта салоҳиятга эга экани яққол кўриниб турибди.  Бу ёш футболчи менга жуда ёқди, у жамоага жуда тез мослашиб олди ва нималарга қодирлигини кўрсатяпти.

Максим Боков, ЦСКА собиқ футболчиси:

Файзуллаев – чемпионатнинг энг зўр ўйинчиси. Бошида Аббос кўриниши билан ҳеч кимни ҳайрон қолдиргани йўқ, лекин кейин ақлли ўйинлари билан ҳаммани ҳайратга солди. Уни тез орада Европага олиб кетишадими ёки йўқ, буни билмайман, лекин Файзуллаев ЦСКАга катта фойда келтириши аниқ.

Файзуллаев “армиячилар” клубида ҳақиқий футболчи бўлиб етишади. Агар у ҳозирги даражадаги ўйинини намойиш қилишда давом этса, катта клублар унга эътибор қаратади.

Александр Алаев, Россия Премьер-лигаси раҳбари:

Мавсумнинг асосий кашфиётлари Файзуллаев, Салтиков ва Севикян бўлди.

Александр Гришин, ЦСКА собиқ футболчиси:

Яхши футболчилар кўп. Ҳар бир жамоада ўз етакчилари бор. Энг зўрлари сифатида Файзуллаев, Кордоба, Тюкавин ва Кассьеррани  тилга олиш мумкин. Булар ўз жамоасига натижа қилиб бераётган асосий фигуралар ҳисобланади.

Дмитрий Хамуха, мураббий:

2023 йилда Файзуллаев жуда яхши таассурот қолдирди. У ақл билан ўйнайди, техникаси ҳам жойида.

Евгений Алдонин, ЦСКА собиқ футболчиси:

2023 йилнинг энг асосий кашфиёти Аббосбек Файзуллаев бўлди. У ўз ҳаракатлари билан ҳаммани хурсанд қиляпти, жамоада асосий ролда ўзи, хавфли вазиятлар яратяпти, гол ҳам уряпти. Селекция нуқтаи назаридан ЦСКА жуда яхши ишлади.

Шомуродов йўқ, Ўзбекистоннинг Осиё кубогидаги энг хавфли футболчиси ким?