"Нурафшон" ("Бухоро") клубига янги раҳбар тайинланди. Унинг зиммасига қарздорликларни бартараф қилиш ва бошқа вазифалар юклатилди

Жорий йилнинг 26 ноябрь куни “Нурафшон” клуби анжуманлар залида навбатдан ташқари йиғилиши бўлиб ўтди. Бу ҳақда клуб матбуот хизмати хабар берди.

Унда Бухоро вилояти ҳокими ўринбосари, вилоят Туризм ва спорт бош бошқармаси бошлиғи Ботиржон Шахриёров, Бухоро нефтни қайта ишлаш заводи маъсул ҳодими ва вилоят Туризм ва спорт бош бошқармаси бошлиғи ўринбосари Исмоил Мирзаев ҳамда “Нурафшон” клуби раҳбарияти, ишчи ходимлари ва жамоа ишқибозлари иштирок этишди.

Йиғилиш давомида клубдаги айни дамдаги вазиятлар, “Бухоро спорт мажмуаси”даги чимнинг ҳолати ва йиғилишнинг асосий кун тартибидаги клубга янги раҳбар тайинлаш тўғрисидаги масалалар кўриб чиқилди. Унга кўра “Нурафшон” клуби бош директори этиб Қодиров Ўткир Олимович тайинланди.

Шунингдек, Ўткир Қодировга маълум мажбуриятлар яъни булар: жамият молиявий ҳолатини яхшилаш, ҳомийлик маблағларини жалб қилиш бўйича аниқ чоралар кўриш, мавжуд кредитор қарздорликларни, шу жумладан ойлик иш ҳақидан қарздорликларни бартараф этиш чораларни кўриш ҳамда келгуси 2022 йилда жамоани Про лигадан Суперлигага олиб чиқиш каби вазифалар юклатилди.