Нурилло Тўхтасинов: Ўйиндан олдин дадамга гол уришни ваъда бергандим!

14 август куни 9-турнинг қолдирилган учрашувида аутсайдер “Бухоро” билан 1:1 ҳисобида дуранг ўйнаган “Бунёдкор” бу сафар 10-тур доирасида “Металлург” билан куч синашиб, рақибини 2:0 ҳисобида мағлуб этишга муваффақ бўлди. Ўйинни ўзгартириб юборувчи вазиятлар эса иккинчи бўлимда юз берди. “Бунёдкор”нинг иқтидорли ярим ҳимоячиси Нурилло Тўхтасинов бирин-кетин иккита гол урган ҳолда жамоасининг ғалабасини таъминлади. Беллашувдан сўнг учрашув қаҳрамонига айрим саволлар билан мурожаат қилдик.

-  Нурилло, аввало сизни ва “Бунёдкор”ни қўлга киритилган ғалаба билан табриклайман. Учрашув борасида қандай фикрдасиз?

-  Албатта, пандемиядан кейинги ўйин қийин бўлди. Барибир чемпионатимиз тўхтаб қолгани ўз таъсирини кўрсатарди. Шунга қарамай, ўзимиз ҳаракат қилдик, айниқса, мураббийимизнинг кўрсатмалари асосида ўйин кўрсатдик. Барчамиз бир жамоа бўлиб курашдик. Тўғриси, бугун ютишимиз шарт эди. Чунки бундан аввал “Бухоро”га қарши қолдирилган ўйинда 1:1 ҳисобида дуранг ўйнаб қимматли икки очкони йўқотгандик. Бу сафар эса Вадим Абрамовнинг кўрсатмаларини пухта бажаришга ҳаракат қилдик. Муҳими, майдонга ғалаба учун тушгандик, буни уддаладик.

-  Сиз эса ўйин қаҳрамонига айландингиз ва энг яхши футболчи деб эътироф этилдингиз. Чунки киритган иккита голингиз якунда “Бунёдкор”нинг ғалабасини таъминлади. Айтмоқчиманки, дублга эришишингизни кутганмидингиз ёки сиз учун сюрприз бўлдими?

-  Иккита гол уришимни ўйламагандим-у, аммо битта гол ураман деб майдонга тушгандим. Буни қарангки, бир эмас, иккита тўп киритдим, Худога шукр. Яширмайман, иккита гол урганим сюрприз бўлди.

-  Адашмасам, фаолиятингизда илк бор бир ўйинда иккита гол урдингиз-а?

-  Ҳа, бу биринчиси бўлди. Фаолиятимда ҳали дубль қайд этмагандим.

-  Шуни ҳисобга олганда, мазкур ўйин фаолиятингизда ўзгача аҳамият касб этадими?

-  Шундай деса ҳам бўлади. Бундан кейин ҳам ундан-да кўпроқ голлар уришга ҳаракат қиламан. Айниқса, бир ўйинда иккитадан кўпроқ гол муаллифи бўлиш учун интиламан.

-  “Металлург”нинг бугунги ўйини хусусида нима дейсиз? Ҳар ҳолда кўпчилик бекободликлардан ҳам жиддий қаршиликни кутишганди...

-  “Металлург” ҳам кучли жамоа. Ўйин давомида уларда ҳам голга тортадиган имкониятлар бўлди. Лекин биз иккинчи бўлимда “Металлург”га қараганда кучлироқ ўйнадик деб ўйлайман. Биринчи бўлимда эса бекободликлар яхшироқ ўйнашганди. Шунчаки, иккинчи бўлимда биз кучлироқ бўлиб чиқдик.

-  Айнан шу ҳақида сўрамоқчи эдим. Танаффус чоғида Вадим Карленович сизларга ўйинни ўзгартириб юбориш учун қандай кўрсатмалар берганди?

-  Биринчи бўлимдан кейин бош мураббийимиз бизга шошилмасликни, хотиржамлик билан ўз ўйинимизни кўрсатишимиз муҳимлигини айтди. Шошма-шошарликка берилмасликни, ҳужумга кўпроқ эътибор қаратишимизни таъкидлади.

-  Киритган иккита голингизни кимга бағишлайсиз?

-  Ота-онамга. Кеча Дадам билан гаплашганимда гол ургин деб ният қилганида, Худо хоҳласа, албатта ураман деб ваъда бергандим. Биринчи голимни дадамга, иккинчисини эса онамга бағишлайман.

-  Вазиятга реал қарасак, бу йил “Бунёдкор” қайси ўрин учун кураша олади деб ўйлайсиз?

-  2-3 – ўринларга. Балки 1-ўрин учун ҳам курашиш имконига эга бўлармиз. Нима бўлса ҳам биз совринли ўринлар учун охиригача курашамиз.

-  Чемпионатимиздаги иккинчи танаффусдан сўнг яна спорт формасига қайтиш қийин кечмаяптими?

-  Тўғри, бироз қийинчилиги бўлди. Лекин аста-секин ўзимизга келяпмиз. Машаққатлар ортда қоляпти. Ҳаммаси яхши бўлади деб умид қиламан. Мураббийларимиз томонидан ҳам жисмоний тайёргарлик бўйича кўрсатмаларни тўлиқ бажаряпмиз.