Нурсултон Рўзибоев собиқ UFC вакили билан жанг қилади

Ўзбекистон ММА оламининг машҳур вакилларидан бири Нурсултон Рўзибоев янги промоушен билан шартнома имзолади ва айнан ушбу промоушендаги дебют жангининг санаси ва рақиби ҳам маълум бўлди. Яъни, ҳамюртимиз эндиликда Баҳрайн промоушени “Brave FC” турнирларида ўз жангини ўтказади.

Биз ушбу маълумотларга янада ойдинлик киритиш мақсадида Нурсултон Рўзибоев билан боғландик.

- Аслида, бу сўнги жангимдан аввал ҳал бўлган эди. Бироқ, жангни ўтказиб олгунга қадар, буни овоза қилмасликни маъқул кўрдик. Чунки, “Open FC” промоушенида жанг ўтказаётгандим. Бу промоушен мутасаддилари билан ҳам гаплашиб олганимиздан сўнг, маълум қилдик. Баҳрайннинг “Brave FC” промоушени билан бешта жангга шартнома имзоладик. Эндиликда фақат ушбу ташкилот турнирларида октагонга кўтариламан. Яъни, эркин агент эмасман. Исталган промоушенда жанг қила олмайман. Бу промоушеннинг нуфузи анчагина юқори, деб айта оламан.

Навбатдаги жангим 11 март куни Манама шаҳрида швециялик Андреас Сталга қарши бўлади. Ушбу рақибим ўз вақтида UFCда иккита жанг ўтказган. Яқиндагина яримўрта вазн тоифаси чемпиони Камару Усман билан жанг қилган Гилберт Бёрнс билан ҳам дуч келган ва очколар ҳисобига имкониятни бой берган. Хуллас, оддий жангчи эмас. Сўнги иккита жангини ғалаба билан якунлаган.

Ушбу промоушенда фаолият юритишнинг яна бир қулай тарафи шундаки, жароҳатлар йироқда бўлиб турса, жанг кунларини ўзимиз белгилаймиз.

Ниятимиз ушбу промоушенда ҳам яхши натижалар қайд этиб, юртимиз шаънини муносиб ҳимоя қилишдир ва бунга бор кучимиз билан ҳаракат қиламиз!