“Ньюкасл” қимматбаҳо ҳужумчини қўйиб юборди

“Ювентус” расмий сайти орқали ҳужумчи Ник Вольтемаденинг “Ньюкасл”дан ижара асосида таркибга қўшилганини маълум қилди. Ижара шартномаси 2027 йил 30 июнга қадар амал қилади.

Журналист Фабрицио Романо хабар беришича, Турин клуби ушбу битим учун 3,5 миллион фунт стерлинг (4 миллион евро) тўлаган.

Германиялик ҳужумчи 2025 йил ёзида “Ньюкасл”га ўтган эди. Ўтган мавсумда Вольтемаде барча мусобақаларда 54 та учрашувда иштирок этиб, 12 та гол урди ва 5 та голли узатма амалга оширди.

Футболчининг Англия клуби билан амалдаги шартномаси 2031 йил ёзига қадар мўлжалланган. Transfermarkt маълумотларига кўра, унинг бозор қиймати 55 миллион  еврони ташкил этади.