Ўзбекистонлик теннисчи машҳур спортчидан қимматбаҳо совға олди

Жаҳон рейтингида иккинчи рақам остида қайд этилган беларуслик ракетка устаси Арина Соболенко ўзбекистонлик спортчи Камилла Рахимовага Gucci сумкасини совға қилди. Бу ҳақда Рахимова Уимблдондан тайёрлаган влоги орқали маълум қилди. 

Рахимованинг сўзларига кўра, у Арина Соболенконинг ижтимоий тармоқдаги қисқа видеолавҳасига жавоб ёзиб, унинг сумкасини мақтаган ва ҳазил тариқасида худди шундай сумка совға қилишини сўраган. Соболенко эса ушбу ҳазилни чиндан ҳам амалга оширган.

«Болалар, бир дақиқа қараб туринг, Арина Соболенко менга нима юборганини кўринг. Бу қиз жуда ҳам саховатли. Бошқа қандай айтишни билмайман. 

Қаранглар, нималигини ўзингиз ҳам кўриб турибсиз. Мен шунчаки унинг сторисига жавоб бериб, сумкаси жуда зўр эканини ёздим. 

“Қачондир совға қиласанми?” деб ҳазиллашдим. Мана, натижаси», — деб ҳикоя қилади Рахимова, совғани намойиш этар экан.

Влогда келтирилишича, Арина Соболенко Gucci сумкасини Рахимованинг шкафида қолдирган, Камилла эса уни шу ердан топгани ҳақида гапириб берган.

Ёзувда Рахимова Соболенкони «дунёнинг биринчи рақамли теннисчиси» деб атаган. Аслида эса ҳозирги кунда беларус спортчиси WTA рейтингида иккинчи ўринни эгаллаб турибди, етакчилик Қозоғистон номидан иштирок этаётган Елена Рибакина қўлида. Камилла Рахимова эса жаҳон рейтингида 76-поғонада жойлашган.