ОЧЛ. Азиз Ғаниев узоқ масофадан гол урган ўйинда "Ал Аҳли" кейинги босқичга йўл олди

Осиё Чемпионлар лигаси нимчорак финалидан ўрин олган Саудия Арабистонининг "Ал-Аҳли" клуби ва Бирлашган Араб Амирликларининг "Шабаб Ал-Аҳли" жамоаси ўртасидаги баҳс якунланди.

Беллашувда дастлаб БАА жамоасида тўп тепаётган ҳамюртимиз Азиз Ғаниев узоқ масофадан гол уриб, ҳисобни очди. Иккинчи бўлимда Омар Ал-Сома мувозанатни тиклади. Учрашувнинг асосий вақтида 1:1 ҳисобидаги дуранг қайд этилгач, экстра таймларга ўтилди.

Қўшимча 15 дақиқадан иборат икки таймда ҳам жамоалар ҳисобни ўзгартира олмади. Пенальтилар сериясида эса, омад "Ал-Аҳли"га (4:3) кулиб боқди.

Шу тариқа, саудияликлар мусобақанинг чорак финалига йўл олди. Ғаниев клуби эса, ОЧЛдаги юришини тўхтатди.