ЎФА яна бир мураббийни футболдан умрбод четлатди
Ads

Ўзбекистон футбол ассоциацияси қошида ташкил этилган махсус инспекция тотализатор ва келишилган ўйинларда иштирок этаётган шахсларга нисбатан кескин курашиб келмоқда. Ана шундай чора-тадбирлар натижасида тотализатор ва келишилган ўйинларда иштирок этаётган шахслар аниқланди. Бу ҳақда ташкилот расмий сайти хабар бериб ўтди.

“Зарангари” футбол клуби раҳбари Фурқат Тоировнинг ЎзПФЛга тақдим этган хати асосида ЎФА махсус инспекцияси суриштирув ишларини олиб борди. 

Хатда “Зарангари” футбол клубининг беш нафар футболчиси келишилган ўйинларда гумон қилинаётгани айтилган бўлиб, уларнинг исм-шарифлари аниқ кўрсатиб ўтилганди. Кейинроқ маълум бўлдики, клуб раҳбариятининг ўзи ноҳалол футболга йўл очиб берган ва бу ишга унамаган футболчиларни туҳмат тариқасида жамоадан четлаштириш чорасини кўрмоқчи бўлган. 

“Зарангари” футбол клуби раҳбари Фурқат Тоиров “Зарангари”да молиявий муаммолар борлигини рўкач қилиб, жамоанинг барча ишларига эндиликда Шерзод Сатторов жавобгар бўлишини футболчиларга расман маълум қилган (Шерзод Сатторов ЎзПФЛ рўйхатидан “Иттифоқ-Бухоро” футбол клуби бош мураббийи сифатида ўтган). “Зарангари” футболчилари Ф.Тоировдан ҳозирги кунгача бўлган молиявий ҳисоб-китобни қилишини талаб қилишган. Мана шу масалада муаммо келиб чиққан.

Кейинроқ Ш.Сатторов барча масалани ўзи ҳал қилишини, керак бўлса трансфер ойнаси очилмаёқ янги футболчиларни жамоага олиб келишга қудрати етиши ҳақида айтган. Ойликдан ташқари пул ишлаш ниятида бўлган футболчилар унинг кўрсатмаси билан тотализаторда иштирок этишлари кераклигини уқтирмоқчи бўлган. 

ЎФА махсус инспекцияси Фурқат Тоиров ҳамда Шерзод Сатторовларнинг футболчилар билан суҳбатлари ёзилган аудиоёзувни тўлиқ қўлга киритди. Маълум бўлдики, Ш.Сатторов ҳамда Ф.Тоиров режасига унамаган футболчиларни ЎзПФЛ орқали гумонлантирилиб, улардан халос бўлишни истаган. Раҳбарлардан фарқли ўлароқ, футболчилар алоҳида-алоҳида суҳбатдан ўтказилганда, уларнинг фикрлари асосли бўлиб чиқди, жамоа аъзолари фактлар асосида кўрсатма бердилар.   

Юқоридагилардан келиб чиқиб, ЎФА Интизом ва одоб-ахлоқ (этика) қўмитаси қарор қабул қилди. Унга кўра  “Иттифоқ-Бухоро” жамоаси бош мураббийи Шерзод Сатторовнинг қилмишлари  кечириб бўлмас, деб ҳисобланди ва у бир умрга футболга алоқадор барча фаолиятдан четлаштирилди. Ш.Сатторов Бухоро вилоятидаги мактаблардан бирида жисмоний тарбиядан ҳам дарс бериши ҳақида айтиб ўтди. Ёш авлодни унинг каби кишилар бошқармаслиги керак деб ҳисобланиб, ЎФА қўмита қарорини мазкур мактабга ҳам тақдим этади. Шунингдек, аудиоёзувларга кўра, Ш.Сатторов ЎФА ҳамда ЎзПФЛнинг айрим ходимларини ҳақорат қилган, уларга жиддий туҳматлар ёғдирган. 

ЎФА Интизом ва одоб-ахлоқ (этика) қўмитаси “Зарангари” футбол клуби раҳбари Фурқат Тоировни 1 йилга футболдан четлаштирди ва 20 миллион сўм жарима жазоси қўллади. Кейинги текширувлар жараёнида унинг ҳам келишилган ўйинларга алоқадорлиги факти топилса, жазо ўзгартирилади. 

Ўзбекистон футбол ассоциацияси футбол соҳасида фаолият юритаётган барча инсонларни огоҳлантиради: мураббий, фуболчи, мутахассис — ким бўлишидан қатъи назар келишилган ўйинларга алоқадорлиги аниқланса, белгиланган тартибда қатъий жазога тортилади.

Эслатиб ўтамиз, ЎФА 2018 йил аввалида бошқа сабаблар билан Ўзбекистон миллий терма жамоаси собиқ бош мураббийи Самвел Бабаянни футболдан бир умрга четлатган эди, аммо орадан икки ҳафта ўтиб «Бунёдкор» клубининг Бабаянни кафилликка олиши ҳақидаги хатга асосан, бу қарор бекор қилингани борасида хабарлар тарқалган эди.

Фикрлар

Фикр қолдириш учун авторизациядан ўтинг!
&
ахмад49
10/06/2019 17:02
УФА америка очибди,изласангиз ПРО лиганинг хаммасидан топилади,УФА дагилар сизлар йиригидан гапиринглар, мисол учун Металлург бекобод Пахтакордан уйинчиларни ижарага олдим деб эвазига хар доим Пахтакорга йирик хисобларда ютказиб беради,утган йили Металлург Пахтакорга 12 очко такдим этди,ёки хакамлар Асимов ва Ш.Косимовларнинг нохолис хакамликларидан гапиринглар ва хокоза.
&
Surxon turon
10/06/2019 16:21
Суперлигадан изланг тиқилиб ётибди бундай мураббий
АС МИЛАН
10/06/2019 16:03
Шунақа футбол клуби борлигини энди эшитим