Оладиган борми? Суперклуб қимматбаҳо ўйинчига нарх белгилади

Италия чемпионатида етакчилик қилаётган “Интер” клуби марказий ҳимоячи Алессандро Бастони  бўйича келиб тушган таклифларни кўриб чиқишга тайёр.

Бу ҳақда Sport.es сайти хабар берди.

Миланликлар сафида фақат ҳужумчилар Лаутаро Мартинес ва Франческо Пио Эспозито тегиб бўлмас футболчилар ҳисобланади. Қолган ўйинчилар эса яхши таклиф бўлса, жамоани тарк этишига рухсат берилади.

Манба маълумотига кўра, “Интер” Бастонини сотиш бўйича музокараларни даъвогарлар томонидан 70 миллион евро таклиф қилинган ҳолатда бошлайди. Бундан паст нархлар кўриб чиқилмайди.

26 ёшли футболчига “Барселона” харидор бўлмоқда ва “Интер” қўйган шартлардан хабардор. Бироқ Каталония клубида 70 миллион евро суммаси анча юқори деб ҳисобланмоқда.

“Барселона” мутасаддилари бу нархни пасайтиришга ёрдам берадиган вариантлар бор деган фикрда. Масалан, битимга “Барселона” футболчиларидан бири қўшилиши мумкин.

Шунингдек, Бастонининг “Интер”дан кетиш истаги ва унинг шахсий молиявий шартлари ҳам музокараларда муҳим роль ўйнаши мумкин.