Олдимизда 5-тур: ғалаба учун кимда қандай имконият бор?

Ушбу ҳафтанинг жума, шанба ва якшанба кунлари Coca-Cola Суперлиганинг навбатдаги 5-тур беллашувлари ўтказилади. Ўтган турдаги ўйинлар ҳамда қайд этилган натижалардан сўнг олдимизда турган янги учрашувлар янада шиддатли ва муросасиз ўтишини тахмин қилишимиз мумкин.

Умид қиламизки, олдинда сиз билан бизни бундан-да, қизиқарли ва кутилмаган натижалар кутиб турибди. Ахир барчамиз футболни соғинганмиз, тўғрими?

Осиё чемпиони бўлган, юртимизнинг тажрибали мутахассисларидан бири Равшан Ҳайдаров ҳам ҳозирда чемпионатимизни диққат билан кузатмоқда. Шу сабабли ушбу мураббий Sports.uz учун 5-тур олдидан ҳар бир жуфтликка тўхталиб, жамоаларнинг имкониятларини чамалаб чиқди.

“Қўқон-1912” – “Қизилқум”

- Иккала клуб ҳам ўтган турда мағлубиятга учрашди. Ўйлайманки, мураббийлар жамоаларидаги муаммо ва камчиликларни кўриб олди. Шу боис ўтган вақт давомида улар ана шу муаммолар устида ишлашаётган бўлса ажаб эмас. Албатта, Қўқонда жанговор учрашув бўлади деб ўйлайман. Масалан, “Қизилқум”да йўқотадиган нарса йўқ. Қўқонликлар эса ўз майдонида ўйнашади. Назаримда, устунлик 60х40 мезбонлар фойдасига.

“Пахтакор” – “Бунёдкор”

- Ўтган турда “Пахтакор” Жиззахда мағлубиятга учради ва бу амалдаги чемпион учун огоҳлик қўнғироғи бўлди. Ўйлашимча, олдинги ўйинни кўриб, таҳлил қилган ҳолда тайёргарлик олиб бормоқдалар. Улар жамоаларни осон ютиб бўлмаслигини тушуниб етган бўлишлари керак. “Бунёдкор”га келсак, улар ўйнайдиган жамоа. Босими йўқ, фақат ўйинга чанқоқ бўлган клублардан бири айнан “Бунёдкор”дир. У ерда футболни мазза қилиб ўйнайдиган йигитлар йиғилган. Албатта, жуда қизиқарли учрашув бўлади. Иккала клубларнинг имкониятларини тенг баҳолайман – 50х50.

“Навбаҳор” – “Бухоро”

- Албатта, ўйин сифати бўйича “Навбаҳор” юқорида. Қаршидаги ажойиб ўйиндан сўнг уларнинг шижоати янада кучайган. Жисмоний тайёргарлиги ҳам меъёрида. “Навбаҳор” ўз уйида ўйнайди, гарчи мухлисларисиз ўйин ўтказса-да, барибир жамоанинг ўйини яхшироқ. Шундай экан, майдон эгаларининг ғолиб чиқиш имконияти катта – 70х30.

“Локомотив” – “Сўғдиёна”

- Ҳозирги пайтда жамоалар ҳар хил ҳолатда. “Сўғдиёна”нинг “Пахтакор”га қарши кўрсатган ўйини ёқди, улар ақлли ўйнашди. Қолаверса, жиззахликларнинг ўз кучига бўлган ишончи ҳам ортган. “Локомотив”да эса футболчилар жамоага мослашиб олишлари лозим. Ўйлашимча, ушбу жуфтликда “Сўғдиёна”нинг имконияти бироз юқори. Барибир жиззахликлар “Пахтакор”га қарши яхши ўйин ўтказишди. Бунинг устига “Сўғдиёна” футболчилари жисмоний тарафдан ҳам яхши тайёрланишганди. Тўғриси, “Локомотив” – “Сўғдиёна” иштирокида жуда қизиқарли учрашув бўлади. Агар “Локо”да жароҳатланган ўйинчилар сафга қайтишса ҳамда мураббийлар муаммоли вазиятларга ечим топа олишса, балки ўйлаган мақсадига эришишлари мумкин. Менимча, дуранг қайд этилиши ҳам мумкин.

АГМК – “Сурхон”

- Бу ерда ҳам жамоалар турлича руҳий ҳолатдалар. Кўриниб турибдики, АГМК жамоаси яхши ҳолатда. Навоийдаги учрашувда олмалиқликлар яхши таассурот қолдиришди. Жисмоний тайёргарлиги ҳам жойида. Таркибида ҳам яхши футболчилар жамланган. Айниқса, индивидуал маҳоратга эга ўйинчилар бисёр. Шундай омиллар бўйича АГМКнинг устунлиги бор. “Сурхон”га келсак, албатта ушбу жамоада ҳам тажрибали футболчилар йиғилишган. Менимча, улардаги муаммо – бу жисмоний тайёргарлик билан боғлиқ. Айниқса, “Сурхон”нинг “Машъал”га қарши кўрсатган ўйинида жамоа жуда оғир кўринди. Фақат ютқазаётганида ҳаракат қилишни бошлади. Агар АГМК билан учрашувгача мураббийлар футболчиларнинг жисмоний ҳолатини бироз яхшилашга эришишса, бу бошқа гап. Бироқ “Сурхон” яна “Машъал”га қарши ўйнагандек ҳаракат қиладиган бўлса, у ҳолда АГМКнинг ғалаба учун имкониятлари юқори.

“Андижон” – “Металлург”

- “Андижон”нинг “Бухоро” билан ўтказган ўйини менга ёқди. Айниқса, жонли ўйин бўлди. Кўриниб турибдики, андижонликлар футболни анча соғиниб қолишган. Бундан ташқари, “Бухоро” билан “Андижон” турнир жадвалида ёнма-ён эдилар. Бундай баҳс эса олти очколик аҳамиятга ҳам эга эди. Лекин ўйин охирида “Андижон” мувозанатни йўқотди ва хатоларга йўл қўйди. Оқибатда ғалабани қўлдан чиқариб юборди. Албатта, “Андижон” ўз майдонида мухлислари кўз ўнгида ўйнаганида ғалаба учун имкониятлари янада ошган бўларди. “Металлург” эса тажрибали жамоа. “Локомотив”ни ақлли ўйин ва тўғри танланган тактика ҳисобига ютиб кетишди. Таркибида эса тажрибали футболчилар тўпланган. Ғалаба учун имконият 40х60 “Металлург” фойдасига.

“Машъал” – “Насаф”

- Барибир “Насаф” жамоаси яхши ҳолатда. Айниқса, клубларнинг сифатига қарайдиган бўлсак, қаршиликларда устунлик бор. “Насаф”да яхши тайёргарлик бор, клубнинг ўзига яраша анъаналари мавжуд. Турнир жадвалида ҳам “Насаф” биринчи ўринда кетяпти. Табиийки, улар пешқадамлигини сақлаб қолиш илинжидалар. Клубнинг кайфияти ҳам яхши. Гарчи учрашув “Машъал”нинг майдонида бўлса-да, барибир мезбон ёки меҳмон ифодаси у қадар катта роль ўйнамайди. Чунки иккаласи ҳам бир вилоят жамоалари. Ўйлайманки, устунлик “Насаф” томонида – 40х60.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)