"Олимпик" "Сурхон"га "қўрқинчли туш" тақдим этгани ёдингиздами ёхуд бугун кимнинг кўчасида байрам бўларкин?

Coca-Cola Суперлиганинг 21-туридан битта ўйин қолиб кетганди. Бугун ўша учрашув ўтказилади. Тошкентдаги “Пахтакор” марказий стадионида “Сурхон” номинал мезбон сифатида пойтахтнинг бошқа бир клуби – “Олимпик”ни қабул қилади.

Аслида чемпионатимизда 24-тур ўйинлари бўлиб ўтган ва 25-турга тайёргарлик кетяпти. “Сурхон” – “Олимпик” ўртасидаги беллашувдан кейин турнир жадвалида мос равишда барча иштирокчиларда ўйинлар тенг – 24 тани ташкил қилади. Шу боис бугун бўлиб ўтадиган ўйинга кўпчилик эътибор қаратса ажаб эмас.

“Сурхон” ҳамда “Олимпик” жамоалари ўртасидаги учрашув анча қизиқарли ўтади, ишонаверинг. Иккала клуб сафида иқтидорли ёшлар бор ва очиқ футбол кўрсатишни жуда хуш кўрадилар. Мана шу фактор бўлажак ўйинга эътиборни ва қизиқишни ошириши табиий. Айниқса, “Олимпик” охирги учта учрашувдан бери ютқазмаяпти. Кападзе жамоаси Фарғонада “Нефтчи”ни 1:0 ҳисобида мағлубиятга учратган бўлса, “Қизилқум” ва “Бунёдкор” билан дуранг ўйнади. Натижада “Олимпик” очколар сонини 28 тага ошириб, мусобақа жадвалида 9-ўринга кўтарилиб олди. 34 очкога эга бўлиб турган “Сурхон” эса 6-поғонани банд этиб турибди. Агар термизликлар жамоаси ютадиган бўлса, ўз ўрнини эгаллашда янада мустаҳкам ўрнашиб олган бўлади.

“Олимпик”да эса янада юқори ўринларга кўтарилиш имконияти мавжуд. Бунинг учун мазкур тўқнашув Кападзе жамоаси учун ҳам яхши имконият демакдир. Фақат ўйин олдидан “Сурхон”да битта йўқотиш бор. Жамоанинг асосий футболчиларидан бири Хумоюн Шербўтаев дисквалификация туфайли ўйинни ўтказиб юборади.

Бу жамоаларнинг ўзаро учрашувлари яқиндагина бошланди. Аниқроғи, илк тўқнашув ўтган йили 2 март санасида содир бўлган. Ўшанда “Олимпик” мезбонлигида ўтган учрашувда ҳисоб очилмаган. 1 август куни иккинчи даврадаги учрашув эса “Сурхон” учун қўрқинчли тушга айланди. Чунки ўша ўйинда “Олимпик” рақиб дарвозасига жавобсиз 5 та гол уришга муваффақ бўлган. Бу йил биринчи даврадаги тўқнашувда жамоалар яна дуранг қайд этишди -1:1.

Хуллас, 3 та ўйинда 1 ғалаба ва 2 дуранг бор. “Сурхон” ҳозирча чемпионатда Кападзе жамоасини мағлубиятга учрата олгани йўқ. Тўплар нисбати 1\6 “Олимпик” фойдасига.

Бугунги учрашув соат 16:00 да бошланади. “Сурхон” – “Олимпик” беллашуви “Спорт” телеканали орқали тўғридан-тўғри эфирга узатилади. Ўйинни эса Абдулла Нурмонов шарҳлайди. Бугун дам олиш кунида Суперлигадаги ягона учрашувни кузатиш ёқимли бўлса керак...

Шуҳратбек Жўраев.