"Олимпик"нинг ғалабаси қандай қилиб мағлубиятга айланди? Бош мураббий қандай изоҳ берди?

Ўзбекистон Кубогида гуруҳ босқичнинг сўнгги - 3-тур баҳслари ўтказилмоқда.

Бу сафарги ўйинлар доирасида Муборакнинг "Машъал" жамоаси ўз майдонида Тошкентнинг "Олимпик" клубига қарши баҳс олиб борди ва 2:1 ҳисобида иродали ғалабани қўлга киритди.

"D" гуруҳида "Машъал" 7 очко билан пешқадамликни қўлга киритди ва кейинги босқич масаласини ҳал қилди.

Учрашувдан кейин ўтказилган матбуот анжуманида "Олимпик" устози Мирко Еличич иштирок этди.

- Футбол сифати томонлама яхши ўйин бўлди. Бугун таркибда ўзгаришларга қўл урдик ва нисбатан камроқ ўйин амалиётига эга бўлаётган йигитларга имкон бердик. Биринчи бўлимни яхши ўтказдик. "Машъал" иккинчи бўлимда ўзгаришлардан кейин ўйинини кучайтирди, биз эса айнан иккинчи 45 дақиқаликни бой бериб қўйдик. Умумий олганда шогирдларим кўрсатган ўйин ёқди

- Баҳром Вафоев номидаги стадионнинг майсаси ҳақида фикрингиз?

- Бу майдонда бемалол футбол ўйнаш мумкин, лекин Суперлигада ўйнаш учун бундан ҳам яхшироқ ҳолатга келтирса бўлади. Бу борада Асрор (Алиқулов) билан ҳам гаплашдим, унга ҳам майдон яхши ҳолатда бўлгани маъқул. Яхши майдонда сифатли футбол ўйнаш мумкин.

- Бу йил кубок баҳслари кутилмаган натижаларга бой бўляпти. Масалан, амалдаги кубок соҳиби "Андижон" ва ундан олдинги кубок ғолиби "Насаф" гуруҳда қолиб кетди. Биринчи лига клублари Суперлига вакиллари билан тенгма-тенг ўйин кўрсатишяпти ва ғалаба ҳам қозонишяпти. Бу ўзбек футболининг ривожланаётганиданми?

- Жорий мавсум Суперлига ўйинларини кузатяпман ва баъзи жамоалар кўрсатаётган футбол сифатидан шахсан ўзим унча қониқмаяпман. Ўзбекистонда академиялар жамоаларига эътибор берила бошланди ва бу аста-секин ўз сўзини айтади, ёш ўйинчилар футбол ўйнашни ўрганиб боришмоқда. Ўзбек футболи тўғри йўлда ва бу ўз самарасини беради.