Олимпиячиларимиздан яна тарихий натижани кутиб қоламиз!

2020 йил биз учун ўта муҳим мусобақа билан бошланмоқда. Олдинги йиллардагидек йилнинг боши ҳисобланган январь ойи барчамизнинг диққат-эътиборимизни яна бир жойга жамламоқда. Гап шундаки, 8-26 январь кунлари Таиландда U-23 Осиё чемпионати мусобақаси бўлиб ўтади. Албатта, бундай нуфузли турнирга олимпия терма жамоамиз анчадан бери тайёргарлик кўриб келаётганидан мухлисларнинг хабарлари бор. Бунинг учун футболимиз раҳбарияти олимпиячиларимизга барча шарт-шароитларни яратиб беришди ва ўртоқлик учрашувлари учун ҳам муносиб рақиблар танланди. Терма жамоамизнинг сербиялик бош мураббийи Любинко Друлович ҳам бир неча бор яратиб берилаётган шароит-у, имкониятлардан миннатдор эканлигини билдириб ўтганди. Вакилларимиз Дубайдаги йиғиндан сўнг январь ойининг бошларида Таиландга йўл олишди. Ҳеч кимга сир эмаски, барчамизнинг олимпиячиларимиздан умидимиз катта.

Шу ўринда Осиё чемпионатининг олдинги мусобақаларига назар ташлайдиган бўлсак, унда Ўзбекистон терма жамоаси ҳам доимий равишда иштирок этиб келмоқда. Ушбу мусобақага эса дастлаб 2014 йили асос солинган. Ўша йили илк U-22 Осиё чемпионати Уммон мамлакатида ўтказилганди. Ўшанда терма жамоамизга ҳозирги кунда «Бунёдкор»нинг мураббийлар штабида фаолият кўрсатиб келаётган Шуҳрат Мақсудов устозлик қилганди. Лекин Уммонда ўтган Осиё чемпионати терма жамоамиз учун омадсиз ўтганди. Ўшанда гуруҳда терма жамоамиз Хитойни 2:1 ҳисобида мағлуб этган бўлса, кейинги иккита беллашувда Ироқ (1:2) ҳамда Саудия Арабистонига (0:1) мағлуб бўлган ҳолда Тошкентга барвақт қайтишганди.

Кейинги Осиё чемпионати 2016 йили Қатарда ўтказилган. Ўша пайтда олимпия терма жамоамизга Самвел Бабаян бош мураббий этиб тайинланганди. Таркиб ҳам иқтидорли ўйинчилардан ташкил топганди. Бироқ бу сафар ҳам терма жамоамиз яна гуруҳда қолиб кетганди. Ўшанда вакилларимиз дастлабки турларда Жанубий Корея билан Ироққа имкониятни бой берганди. Учинчи турда эса Яманни 3:1 ҳисобида енгишган. Шунга қарамасдан Самвел Бабаян бошчилигидаги терма жамоамиз гуруҳдан чиқа олмаганди.

олимпия 2

2018 йилнинг январь ойида Хитойда ўтган Осиё чемпионати эса ўзбек футболи тарихининг зарварақларидан жой олгани барчамизга яхши маълум. Ўшанда Равшан Ҳайдаров бош мураббийлиги остида мусобақада иштирок этган терма жамоамиз чинакамига қаҳрамонлик кўрсатиб ҳақли равишда Осиё чемпионлигини қўлга киритишганди. Икки йил олдинги мусобақани шу дақиқаларда яна қайта эслаш эса сиз-у, бизга ёқимли онларни эслатса ажаб эмас. Ёдингизда бўлса, терма жамоамиз ўша Осиё чемпионатини мағлубият билан бошлаганди. Дастлабки турда Қатар терма жамоаси ягона гол эвазига вакилларимизни мағлуб этишганди. Ўшанда терма жамоамиз қийин вазиятга тушиб қолганди. Чунки иккинчи турда мезбон – Хитойга қарши ўйинда ютқазадиган бўлсак, у ҳолда терма жамоамиз учун мусобақа муддатидан олдин ўз ниҳоясига етган бўларди. Аммо ўшанда футболчиларимиз ирода намойиш этишиб, Хитойни ҳам, Уммонни ҳам енгиб кейинги босқичга чиқишди. Чорак финалда эса Ўзбекистон Японияга қарши баҳсда ўзига хос ўйин кўрсатган ҳолда кунчиқар юрт вакиллари дарвозасига жавобсиз тўртта гол ургани барчамизнинг ёдимизда. Ярим финалда эса яна бир асосий рақобатчилардан бири Жанубий Корея тўқнаш келганди ва бу сафар ҳам Ҳайдаров жамоасидан чинакамига мастер-классни кўрганмиз ва йирик 4:1 ҳисобидаги ғалабани тантана қилгандик. Ҳал қилувчи баҳсда эса Ўзбекистон Вьетнам билан куч синашган ва ўша беллашув қорли майдонда ўтказилганини ҳалигача ҳаммамиз яхши эслаймиз. Қийин шароитда ўтган баҳсда терма жамоамиз мардонавор ўйин кўрсатиб 2:1 ҳисобида ғалаба қозониб Осиё чемпиони деган шарафли номга сазовор бўлганди.

Шундай экан, олимпия терма жамоамиз Таиландга амалдаги Осиё чемпиони сифатида ташриф буюрди. Шуни ҳам айтиш керакки, олимпия терма жамоамиз қитъа чемпионатига илк бор хорижлик мутахассис бошчилигида етиб келди. Бунинг устига сербиялик Любинко Друлович учун ҳам бу терма жамоамиз бош мураббийлиги остида муҳим синов ҳисобланади. Дарвоқе, 2013 йили Друлович Сербия ёшлар терма жамоаси устози сифатида Европа чемпионлигини ҳам қўлга киритганини алоҳида айтиб ўтиш жоиз. Демак, Ўзбекистон терма жамоасида ҳар томонлама чемпионлар йиғилган десак муболаға қилмаган бўламиз. Чунки 2018 йилги таркибдан ҳам бир қатор футболчилар терма жамоамиз билан бирга Таиландга етиб келишган. Қолаверса, чемпион мураббийга айланган Равшан Ҳайдаровнинг ҳам Друловичнинг мураббийлар штабида борлиги биз учун плюс.

друлович

Мураббийларимиз Осиё чемпионатида юртимиз шарафини ҳимоя қиладиган 23 нафар футболчилар рўйхатини аллақачон эълон қилишган. Таркиб бўйича мураббийлар билан ортиқча баҳслашиш ноўрин. Негаки, Друлович бошчилигидаги мураббийлар штаби ўзлари учун энг мақбул бўлган ўйинчиларни танлаб олишди. Шундай экан, нега уни олди ёки нега бунисини таркибга олмади, деган гап-сўзларга мутлақо ўрин йўқ. Мураббийлар бугунги кунда энг кучли бўлган ва фойда келтира оладиган футболчиларни жалб этишди. Бунинг устига терма жамоамиз мусобақагача ўтказган ўртоқлик учрашувларида хам яхши таассурот қолдиришган ҳолда кетма-кет ғалабаларга эришишгани ҳам эътиборга молик. Демак, жамоамизнинг кайфияти ҳамда ички муҳити аъло даражада.

Терма жамоамиз дастлабки ўйинини 9 январь куни Эрон терма жамоасига қарши ўтказади. Беллашув эса Сонгхла шаҳридаги 45000 минг мухлисга мўлжалланган «Тинсуланон» стадионида бизнинг вақтимиз билан 15:15 да бошланади. Вакилларимиз иккинчи ўйинини 12 январь куни яна шу стадионда Хитой терма жамоасига қарши ўтказади ва баҳс 18:15 да старт олади. Гуруҳдаги охирги беллашувда эса терма жамоамиз Жанубий Корея билан курашади. Мазкур тўқнашув эса 15 январь куни Бангкокдаги «Таммасат» стадионада соат 15:15 да бошланади. Ҳамма яхши тушуниб турибдики, асосий мақсад Токио Олимпиадаси йўлланмасини қўлга киритишдани иборат. Барча саъйи-ҳаракатларимиз эса айнан ушбу мақсадни амалга оширишга қаратилган. Кўз тегмасин, ҳозирча терма жамоамизнинг ишлари режа бўйича кетмоқда. Энди эса ҳал қилувчи баҳслар бошланиш арафасида турибди. Друловични эса айнан терма жамоамизни Олимпиадага олиб чиқиши учун таклиф қилганмиз. Шунинг учун сербиялик мутахассиснинг ўзини кўрсатадиган пайти келди. Биз энг сара ва иқтидорли футболчиларимиз жамланган терма жамоамизга ишонамиз ва уларни қўллаб-қувватлаймиз. Умид қиламизки, Ўзбекистон терма жамоамиз 26 январь санасигача Таиландда қолади.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)