Олмалиқда марказий баҳс, Шацкихда дебют ўйин ёхуд Суперлиганинг 10-тури олдидан

Бугун Суперлиганинг 10-турига старт берилади. 16-19 май кунлари сиз билан биз бир-биридан ажойиб 8 та тўқнашувга гувоҳ бўламиз. Максим Шацких “Андижон” бош мураббийи сифатида дебютини ўтказади. ОКМК – “Нефтчи” қарама-қаршилиги эса турнинг марказий ўйини ҳисобланади.

16 май

20:00. “Сурхон” – “Сўғдиёна”

Суперлиганинг 10-тури бугун Термизда очиб берилади. Унда “Сурхон” мухлислари қаршисида “Сўғдиёна”ни қабул қилади. Ўтган сафар Ўзбекистон Кубоги доирасида ўз уйида биринчи лига вакили “Лочин”га 1:3 ҳисобида ютқазиб мухлисларини қаттиқ ранжитиб қўйди. Ўша мағлубият тасодифлигини исботлаш учун “Сўғдиёна”ни мағлуб этиши шарт. Аксига олиб жиззахликларнинг ҳам натижалари яхши эмас. Охирги турда уйида “Шўртан” билан баҳсда зўрға мағлубиятдан қутулиб қолди. Шу кунгача фақат 2 та ғалаба қозонди холос. “Сурхон” билан “Сўғдиёна”ни фақат икки очко ажратиб турибди холос. Охирги пайтларда жиззахликлар устози Иван Бошковични курсиси қимирлаб қолгани ҳақида қулоққа чалинди. Балки бу унинг учун охирги учрашув бўлиши ҳам ҳеч гап эмас.

17 май

18:00. “Бухоро” – “Динамо”

Суперлигада кетма-кет 6 турдан бери ютқазиб келаётган “Бухоро”ни бу сафар “Динамо”га қарши яна бир оғир учрашув кутяпти. Самарқанд жамоаси ҳали мағлубият нималигини билмай келяпти. “Бухоро” бош мураббийи Улуғбек Бақоев аллақачон истеъфога чиқишини айтган, аммо раҳбарият уни қолдиришга кўндирганди. Шунга қарамай, жамоаси ҳамон ютқазишда давом этмоқда. “Бухоро” учун ғалаба сув ва ҳаводек зарур. “Динамо” ўйин бўйича “Бухоро”дан устунроқ. Мезбонлар руҳий тушкунликка тушиб қолгани боис ҳам ўзига кела олмаяпти. Кўрамиз, бу сафар Бақоев қандай ўзгариш қила оларкин?

20:00. “Қўқон-1912” – “Насаф”

Мухлисларни яна бир ажойиб беллашув кутиб турибди. Ҳар қандай жамоага ва шу жумладан “Насаф”га ҳам водийда ўйнаш қийин.  Рўзиқул Бердиев жамоаси чемпионатда ҳали ютқазмаган бўлса-да, Ўзбекистон Кубогидан чиқиб кетди. “Пахтакор”га 6:3 ҳисобида имкониятни бой бериб қўйди. “Қўқон-1912” ўзидан яхши таассурот қолдираётгани ҳам ҳақиқат. Бу шубҳасиз жанговар ўйин бўлади. Баҳром Ҳайдаров жамоаси “Аждарлар”га муносиб қаршилик кўрсатиши шубҳасиз.

20:30. “Шўртан” – “Андижон”

13 май куни “Андижон” клубига Максим Шацких бош мураббий этиб тайинланди эртасидан ишга киришди. “Шўртан”га қарши баҳс эса Максим Александровичнинг “Бургутлар”даги дебют учрашувига айланади. Биласиз, ғузорликлар чемпионатда ғалабасиз серияни давом эттириб, икки очко билан охирги поғонада. Ўтган турда Жиззахда тайёр ғалабани қўлдан чиқариб юборди. Лекин Кубок доирасида жамоа гуруҳдан чиқишга эришди ва “Иштихон”ни 6:0 ҳисобида енгди. Бироқ бу сафар чемпионат доирасидаги баҳс оғир ўтиши табиий. Устига-устак андижонликлар 5 та учрашувдан бери мағлубиятга учрамоқда. Шу боис мухлислар ҳам Шацких бошчилигида мағлубиятсиз серияга барҳам бўлиб, ғалабали серия бошланишига умид қилишмоқда.

18 май

19:00. “Бунёдкор” – “Навбаҳор”

Тошкентда Илёс Зейтуллаев жамоаси Сергей Лушчан бошчилик қилаётган “Навбаҳор” билан тўқнаш келади. “Бунёдкор” очиқ ва ҳужумкор ўйин кўрсатадиган жамоа. Бундай клубга қарши “Навбаҳор” аввало ҳимоядан ўйнайдими ёки Лушчан бошқача тактика қўлламоқчими? Буни ўйин давомида кўриб оламиз.

20:15. “Хоразм” – “Машъал”

Про лигадан Суперлигага чиққан ушбу икки клуб ўртасидаги учрашув қандай ўтаркин? Иккала жамоа ҳужумкор ўйнамоқчими? Катта эҳтимол Ҳаким Фузайлов жамоаси мезбон сифатида ҳужумкор ўйнамоқчи. “Машъал” ҳам қарши ҳужумда ўз имкониятидан фойдаланмоқчи, албатта. Иккала жамоани ҳам дуранг қониқтирмаса керак.

21:00. “Қизилқум” – “Пахтакор”

Ушбу ўйин 21:00 га белгиланди ва чемпионатимиздаги энг кеч вақтда бошланадиган учрашув бўлиб турибди. “Пахтакор”га Камолиддин Тожиев вақтинча бош мураббий этиб тайинлангач, жамоа кўпроқ голлар уриб келяпти ва табиийки, натижалари ҳам яхшиланяпти. “Қизилқум” Навоийдаги аренасига қайтгач, мухлисларнинг оқими ҳам кўпайди. “Пахтакор”га қарши ўйинда ҳам стадион томошабинлар билан тўлиши мумкин. Ким камроқ хато қилса ўша жамоа мақсадига эришиши мумкин.

19 май

20:00. ОКМК – “Нефтчи”

Турнинг марказий учрашуви шубҳасиз Олмалиқда бўлиб ўтади. Миржалол Қосимов жамоаси охирги дақиқаларда нималар қилаётганини ва муҳим ғалабаларни айнан сўнгги дақиқаларда илиб кетаётгани эътиборга молик. “Нефтчи” ҳам тажрибали футболчилари билан ғалабани ўзи билан олиб кетишни мақсад қилган. Майдонда қаттиқ жанг кетади, бу аниқ. Қолгани эса футболчиларнинг қанчалик аниқ ҳаракат қилишига боғлиқ.