Ўн етти киши умрбод футболдан четлатилди!

Хитой футбол ассоциацияси (CFA) мамлакат футболидаги келишилган ўйинлар, қимор ва бошқа қоидабузарликлар билан боғлиқ санкцияларнинг учинчи пакетини эълон қилди, деб хабар бермоқда “Синьхуа” ахборот агентлиги.

Тақдим этилган маълумотларга кўра, Хитой судлари томонидан ҳукм қилинган 17 киши футбол билан боғлиқ ҳар қандай фаолиятдан умрбодга четлатилди, соҳа интизомини жиддий бузган бошқа 48 нафар мутахассис эса беш йилгача бўлган муддатга дисквалификация қилинди.

Жазолар қоидабузарликнинг хусусияти, пул миқдори, тез-тез такрорланиши ва ғаразли мақсад даражаси каби омиллардан келиб чиқиб белгиланди.

Бундан олдин, 2024 йилнинг сентябрида ва 2026 йилнинг январида Хитой футбол ассоциацияси интизомий жазоларнинг иккита пакетини эълон қилган эди. Уларнинг натижасида 100 дан ортиқ киши умрбод дисквалификация қилинган ва 10 дан ортиқ клуб жаримага тортилган эди.