Оқ Уйдаги UFC турнирида жуда катта фожиа юз бериши мумкин эди

АҚШ Федерал қидирув бюроси (ФБИ) Оқ Уй ҳудудида ўтказилиши режалаштирилган "UFC Freedom 250" турнирига қарши эҳтимолий террорчилик ҳужумининг олди олинганини маълум қилди.

Расмий маълумотларга кўра, 10 июнь куни аниқланган таҳдид юзасидан олиб борилган тергов натижасида 5 нафар гумондор қўлга олинган. Шунингдек, ҳуқуқ-тартибот органлари яна 23 кишини эҳтимолий фитна тармоғи билан боғлиқ шахслар сифатида аниқлаган.

АҚШ ОАВларида тарқалган хабарларга кўра, гумондорлар портловчи моддалар билан жиҳозланган дронлардан фойдаланиб, тадбир ўтказиладиган ҳудуд яқинидаги биноларга ҳужум уюштиришни режалаштирган. Дастлабки маълумотларга кўра, ушбу ҳаракатлар оммавий ваҳима келтириб чиқариши ва кейинги босқичдаги ҳужумларга замин яратиши керак бўлган.

Бироқ тергов ҳали давом этмоқда ва ҳужум сценарийсига оид айрим тафсилотлар ҳозирча тўлиқ тасдиқланмаган. ФБИ эса таҳдид бартараф этилгани ва тадбир хавфсизлигини таъминлаш бўйича зарур чоралар кўрилганини билдирган.