"Ўрнимга бошқаси келади" - Суперлигага қайтган "Локомотив"да бош мураббий ўзгаради

Бу йил про лигада иштирок этган Тошкентнинг “Локомотив” клуби кутилганидек 1-ўрин билан Суперлига йўлланмасини қўлга киритди. Про лига ғолиби сифатида яна кучлилар сафига қайтган “темирйўлчилар” лигада  яна аввалги мавқеини тиклаш илинжида.

Аммо таъкидлаш керакки, жамоа про лигада ўзига яраша осон бўлмаган учрашувларни ҳам ўтказди. Бир сўз билан айтганда, “Локомотив” бир жамоа сифатида олдига қўйилган вазифани муваффақиятли адо этди.

Лекин янги мавсумда жамоада албатта ўзгаришлар бўлади. Про лига мусобақаси якунига етганидан кейиноқ бу ишлар бошлаб юборилди. Сабаби, “Локомотив” бош мураббийи сифатида фаолият олиб борган Денис Коростиченко клуб билан хайрлашгани маълум бўлди. Ушбу хабарни эшитишимиз биланоқ Денис Владимирович билан боғландик.  

- Денис Владимирович, клубдан кетишингизга нима сабаб бўлди?

- Бошқа мураббий келади!

- “Локомотив” Суперлига йўлланмасини қўлга киритди ва вазифани бажарди. Шундай экан, кетишингиз сизнингча тўғрими?

- Раҳбарият шунақа қарорга келди. Бошқа сўз йўқ.

- Аслида ҳам мавсум якунида хайрлашишингизни билармидингиз?

- Охирга ўйиндан кейин кичикроқ йиғилиш бўлганди. Ўшанда бизни масаламизни, яъни, қолиш ёки кетишимиз ҳақида ўйлашаётганини айтишган.

- “Локомотив” сиз учун қадрли эди. Бу жамоани тарк этиш оғир бўлдими?

- Менга жамоани бошқариш имкониятини тақдим этгани учун Тўлабек Акрамовга миннатдорчилик билдираман. Кетиш ҳеч қачон осон бўлмайди, айниқса, бу сизнинг қарорингиз эмас, балки клубнинг қарори бўлса! Лекин бу ҳолат ишимизнинг бир қисми.

- Энди кейинги режаларингиз қандай?

- Ҳозирча уйдаман. Кейинги йилга иш топаман, Худо хоҳласа.

- Жамоага нима бердим ва нима ўргандим, дея оласиз?

- Ўзим учун кўп нарса ўрганиб олдим. Бу мен учун катта тажриба бўлди.

- Нима деб ўйлайсиз, “Локомотив” Суперлигада сизга ишонмадими?

- Балки шундайдир.

Кўриб турибсизки, Коростиченко кетганини тасдиқлади ва раҳбариятнинг қарорини тўғри қабул қилди. Бироқ клубдан кетиш мураббийнинг ташаббуси эмас. Шунчаки, “Локомотив” раҳбарияти янги мавсум учун жамоага бошқа мураббийни олиб келмоқчи. Тез орада клубда яна бошқа ўзгаришлар ҳам бўлиши кутилмоқда.

Шуҳратбек Жўраев.