Ўруновнинг янги трансфер нархи маълум бўлди!
Трансферларга ихтисослашган трансфер transfermarkt.de портали Россия премьер-лигаси футболчиларининг мавсум якуни бўйича янгиланган нархини эълон қилди.
Маълумки, ўтган мавсумда Россия премьер-лигасида уч нафар ҳамюртимиз тўп тепганди. Элдор Шомуродов “Ростов”да саккизта учрашувда майдонга тушганидан кейин октябрь ойида “Женоа”га кўчиб ўтганди. Ҳамюртимизнинг Италиядаги дебют мавсуми муваффақиятли бўлгани барчамизни хушнуд этмоқда. Айни пайтда Шомуродов Ўзбекистон миллий терма жамоаси сафида 2022 йилги жаҳон чемпионати ва 2023 йилги Осиё кубоги қўшма саралаш турнирида иштирок этишга тайёрланмоқда.
Шунингдек, ёзги трансферлар вақтида Москванинг “Локомотив” жамоаси сафига қўшилган Жасур Жалолиддинов Россия футболига кира олмади. Истеъдодли ёш футболчимиз, кейинчалик “Тамбов”га ижарага берилган бўлса-да, премьер-лигада дебют қилишига имкон беришмади. Натижада Жасур “Локомотив” билан кўп йиллик шартномани бекор қилиб, ортга қайтди.
Жасур ҳаммасини бошидан бошлаш учун ўзида куч топа олди. “Андижон”дан қўним топган футболчи яқинда 21 ёшгача бўлган футболчилардан таркиб топган терма жамоамиз сафида Украинадаги халқаро турнир ғолиби бўлди. Мусобақада иккита учрашувда иккита гол урган Жалолиддинов турнирнинг энг зўр футболчиси, деб топилгани ҳам унинг имконияти кенгайиб бораётганидан далолат беради.
Якунланган мавсум олдидан “Спартак”га ўтиб, шов-шув кўтарган Остон Ўруновдан умидимиз катта эди. “Уфа” таркибида ярим йил тўп тепиб, креатив ўйини билан нималарга қодирлигини кўрсатиб қўйган истеъдодли ярим ҳимоячимизнинг пойтахт жамоасида омади чопмади. “Спартак”нинг асосий таркибига кира олмаган Остон қишда “Уфа”га қайтганди. Лекин бу жамоада ҳам аввалги даражасига кўтарила олмади.
Натижада Ўруновнинг трансфер суммаси пасайишда давом этмоқда. Тransfermarkt.de портали эълон қилган янгиланган рейтингда Остоннинг трансфер нархи бир ярим миллиондан уч юз минг евро пасайиб, айни пайтда 1,2 миллион еврони ташкл қилмоқда.
Ўрунов трансферининг динамикасика назар ташласак, у жадал кўтарилиб келаётган эди. Ҳамюртимиз 2017 йили “Пахтакор” аъзоси бўлганида 25 минг еврога баҳоланган. “Навбаҳор”даги икки йил давомида унинг нархи 75 минг евродан кескин кўтарилди ва 2019 йили Тошкентнинг “Локомотив” жамоасига қўшилганида бу сумма бир миллион еврога етганди.
Кейинчалик 2020 йилнинг бошида “Уфа”да 900 минг еврога тенглаштирилган трансфер суммаси йил ўртасига бориб, 1,5 миллионга кўтарилди. Икки жамоа сафида премьер-лига ва кубок мусобақасида жами 19 та ўйин, битта гол ва битта голли узатма билан омадсиз якунланган мавсумдан сўнг, вазият салбий томонга ўзгарганини кўриш мумкин.
Шундай бўлса-да, “Спартак” қишда ўзбек футболчисини “Рубин”га олти миллион еврога, мавсум охирида “Уфа”га 3 миллион еврога сотишга уринган эди.
Хуллас, бу муваффақиятсизликлардан кейин Остон Ўруновни катта синовлар кутиб турибди. Тўғриси, премьер-лигада бирорта жамоа унга оғиз солаётгани йўқ. Уфаликлар ҳам ўзини кўрсатолмаган футболчини “Спартак”га қайтариб берди.
Остон билан яна тўрт йил ҳамкорлик қилиши керак бўлган “Спартак” раҳбарияти қарорига кўра, 20 ёшли легионеримиз иккинчи жамоага ўтказилди ва келаси мавсумни Россия Миллий футбол лигасида ўтказадиган бўляпти.
Фикрлар
Adashmasam 2 yildan buyon buni mashmashasi tugamadi!
O'zbek futbolidayam bir tiyinlik nafi yo'q!
O'rinov u qildi, O'rinov bu qildi!
Xullas bu yerda daraja, tayyorgarlik, harakat 0 ga teng!