Осиё Кубоги (U-23). 10 футболчи берган "Насаф", мағлуб бўлмаган термалар... ёхуд гуруҳ босқичининг энг кўзга кўринган статистикалари!

Хабарингиз бор, Токиода бўлиб ўтадиган ёзги Олимпияда ўйинларига йўлланма берувчи Осиё Кубоги (U-23) бўлиб ўтмоқда.

Ушбу мусобақанинг гуруҳ босқичида қайд этилган энг қизиқарли статистикаларни эътиборингизга ҳавола этамиз.

Гуруҳ босқичидаги барча ўйинларда ғалаба қозониш, фақатгина Жанубий Корея терма жамоасига насиб этди. Жанубий Корея терма жамоаси Хитойни 1:0, Эронни 2:1 ва Ўзбекистонни 2:1 ҳисобларида мағлуб этиб, 9 очко жамғарган ҳолда, плей-офф босқичига йўл олди.

7 та терма жамоа мағлубият нималигини билмади ва шулардан 5 таси, Австралия, Жанубий Корея, Саудия Арабистони, БАА ва Иордания чорак финалга йўл олди. Ироқ ва Қатар термалари ҳам бирор марта имкониятни бой беришмади, аммо 3 та ўйинда 3 та дуранг қайд этган иккала терма жамоага ҳам плей-офф босқичига чиқиш насиб этмади.

А гуруҳида иккинчи ўринни эгаллаган, мезбон мамлакат Таиланд умумий 7 та гол урди ва бу борада гуруҳ босқичида рақиб дарвозаларига энг кўп йўл топган жамоа бўлди. Хитой термаси эса бирорта ҳам гол уролмади.

1996 йилнинг декабрь ойида таваллуд топган Ироқ терма жамоасининг ярим ҳимоячиси Муҳаммад Қосим рақиблари дарвозасига 3 та гол урди ва тўпурарлар рўйхатида якка пешқадамга айланиб олди.

Муҳаммад Қосимдан ташқари, Абдулраҳмон Баракот (Сурия), Ли Донг-Жун (Ж.Корея), Муҳаммад Марҳун (Баҳрайн), Ник Дагостиньо (Австралия), Ёсин Дали (Сурия), Оҳ Сё-Ҳун (Ж.Корея), Абдулраҳмон Ал-Амири (БАА), Вонгкорн (Таиланд) ва ҳамюртимиз Исломжон Қобилов ҳисобларида 2 тадан гол бор.

Гуруҳ босқичида ўйнаган энг ёш футболчи, бу Таиланд форварди Суфъанат Муента бўлди. У Баҳрайн термасига қарши ўйинда 17 ёш-у/5 ой/6 кунлигида майдонга тушди.

Ироқ терма жамоаси ярим ҳимоячиси Али Ҳамид Қосим Таиланд (1:1) га қарши кечган баҳсда 23 ёш-у/10 ой/9 кунлигида тўп сурди ва гуруҳ босқичида ўйнаган энг ёши катта футболчи бўлди.

Хабарингиз бор, "Насаф" клубидан 10 та футболчи терма жамоамиз сафига жалб қилинган. Ушбу мусобақада бошқа ҳеч қайси клуб бунчалик кўп футболчи терма жамоага етқазиб бермаган. Вьетнамнинг "Ҳа Ной" ва Баҳрайннинг "Ал-Муҳаррақ" клубларининг 6 тадан футболчиси Осиё Кубогида иштирок этди.

Яна бир қизиқ томони, Ўзбекистон Суперлигасидан 23 та футболчи терма жамоамиз аъзоси ҳисобланади ва бирорта ҳам легионер йўқ! Бошқа ҳеч қайси лигадан 23 та футболчи терма жамоага чақирилмаган.

Қатар юлдузлар лигасидан 22 нафар футболчи мусобақада қатнашди.

Мусобақада умумий 65 та сариқ ва 3 та қизил карточка кўрсатилди. Бу борада, Япония терма жамоаси етакчилик қилди. Япон футболчилари ўтказилган 3 та беллашувда 5 маротаба огоҳлантирилган бўлса, яна 2 маротаба қизил карточка билан жазоланишди.

Жанубий Корея ва Ироқ терма жамоаси бор-йўғи икки маротабадан сариқ карточка олди. Бу борада, Ўзбекистон терма жамоаси КҲДР билан бир ҳил, яъни 3 маротабадан ҳакамлар томонидан огоҳлантирилишди.