Osiyo Kubogi (U-23). 10 futbolchi bergan "Nasaf", mag‘lub bo‘lmagan termalar... yoxud guruh bosqichining eng ko‘zga ko‘ringan statistikalari!

Xabaringiz bor, Tokioda bo‘lib o‘tadigan yozgi Olimpiyada o‘yinlariga yo‘llanma beruvchi Osiyo Kubogi (U-23) bo‘lib o‘tmoqda.

Ushbu musobaqaning guruh bosqichida qayd etilgan eng qiziqarli statistikalarni e’tiboringizga havola etamiz.

Guruh bosqichidagi barcha o‘yinlarda g‘alaba qozonish, faqatgina Janubiy Koreya terma jamoasiga nasib etdi. Janubiy Koreya terma jamoasi Xitoyni 1:0, Eronni 2:1 va O‘zbekistonni 2:1 hisoblarida mag‘lub etib, 9 ochko jamg‘argan holda, pley-off bosqichiga yo‘l oldi.

7 ta terma jamoa mag‘lubiyat nimaligini bilmadi va shulardan 5 tasi, Avstraliya, Janubiy Koreya, Saudiya Arabistoni, BAA va Iordaniya chorak finalga yo‘l oldi. Iroq va Qatar termalari ham biror marta imkoniyatni boy berishmadi, ammo 3 ta o‘yinda 3 ta durang qayd etgan ikkala terma jamoaga ham pley-off bosqichiga chiqish nasib etmadi.

A guruhida ikkinchi o‘rinni egallagan, mezbon mamlakat Tailand umumiy 7 ta gol urdi va bu borada guruh bosqichida raqib darvozalariga eng ko‘p yo‘l topgan jamoa bo‘ldi. Xitoy termasi esa birorta ham gol urolmadi.

1996 yilning dekabr oyida tavallud topgan Iroq terma jamoasining yarim himoyachisi Muhammad Qosim raqiblari darvozasiga 3 ta gol urdi va to‘purarlar ro‘yxatida yakka peshqadamga aylanib oldi.

Muhammad Qosimdan tashqari, Abdulrahmon Barakot (Suriya), Li Dong-Jun (J.Koreya), Muhammad Marhun (Bahrayn), Nik Dagostino (Avstraliya), Yosin Dali (Suriya), Oh Syo-Hun (J.Koreya), Abdulrahmon Al-Amiri (BAA), Vongkorn (Tailand) va hamyurtimiz Islomjon Qobilov hisoblarida 2 tadan gol bor.

Guruh bosqichida o‘ynagan eng yosh futbolchi, bu Tailand forvardi Suf’anat Muenta bo‘ldi. U Bahrayn termasiga qarshi o‘yinda 17 yosh-u/5 oy/6 kunligida maydonga tushdi.

Iroq terma jamoasi yarim himoyachisi Ali Hamid Qosim Tailand (1:1) ga qarshi kechgan bahsda 23 yosh-u/10 oy/9 kunligida to‘p surdi va guruh bosqichida o‘ynagan eng yoshi katta futbolchi bo‘ldi.

Xabaringiz bor, "Nasaf" klubidan 10 ta futbolchi terma jamoamiz safiga jalb qilingan. Ushbu musobaqada boshqa hech qaysi klub bunchalik ko‘p futbolchi terma jamoaga etqazib bermagan. Vetnamning "Ha Noy" va Bahraynning "Al-Muharraq" klublarining 6 tadan futbolchisi Osiyo Kubogida ishtirok etdi.

Yana bir qiziq tomoni, O‘zbekiston Superligasidan 23 ta futbolchi terma jamoamiz a’zosi hisoblanadi va birorta ham legioner yo‘q! Boshqa hech qaysi ligadan 23 ta futbolchi terma jamoaga chaqirilmagan.

Qatar yulduzlar ligasidan 22 nafar futbolchi musobaqada qatnashdi.

Musobaqada umumiy 65 ta sariq va 3 ta qizil kartochka ko‘rsatildi. Bu borada, Yaponiya terma jamoasi etakchilik qildi. Yapon futbolchilari o‘tkazilgan 3 ta bellashuvda 5 marotaba ogohlantirilgan bo‘lsa, yana 2 marotaba qizil kartochka bilan jazolanishdi.

Janubiy Koreya va Iroq terma jamoasi bor-yo‘g‘i ikki marotabadan sariq kartochka oldi. Bu borada, O‘zbekiston terma jamoasi KHDR bilan bir hil, ya’ni 3 marotabadan hakamlar tomonidan ogohlantirilishdi.