“Локомотив” клуби чемпионатнинг сўнгги турида Қаршида “Насаф” билан куч синашди. “Темирйўлчилар” мазкур ўйинда гарчи биринчи бўлиб дарвозасидан тўп ўтказиб юборса-да, иккинчи бўлимда меҳмонлар учта гол уришни уддалади.

Мазкур бахсдан кейин Sports.uz мухбири “Локомотив” етакчиларидан бири Диёр Туропов билан ғалабали ўйин, Секейранинг кетиши ва кейинги режаси борасида суҳбатлашди.

- Тўғриси, учрашувдан олдин “Насаф”нинг ғалабасини кўпчилик кутганди. Чунки улар иккинчи ўрин учун курашаётганди. Аммо “Локомотив” иродасини кўрсатди ва учта гол уриб 3 очкони қўлга киритди. Бундай қизиқарли кечган баҳсдан кейин бизга нималарни айта оласиз?

- Ўйин ҳақида таассуротларми? Биз бу учрашувга яхши тайёргарлик кўргандик. “Насаф” ҳам яхши ўйнади. Улар Ўзбекистон Кубоги ярим финалида АГМКни ютиб финалга чиққанидан кейин ўйлашимча, биз билан ўйинга тўлиқ тиклана олмадилар. Майдонда ўйнаётган футболчилар буни яхши тушунишади. “Насаф” жамоаси дам олиш кунларида ўзини кутилган даражада тиклай олмади. Шунақа деб ўйлайман. Қолаверса, уларнинг футболчиси қизил карточка билан майдондан чиқиб кетгани ҳам таъсир қилди. “Локомотив”ни ҳам ўзига яраша кучли жиҳатлари бор. “Насаф”дан кўра, ҳар жабҳада яхшироқ ва чиройлироқ ўйнадик. Ҳаммаси адолатли бўлди.

диёр5

- “Локомотив” мавсумни ғалаба билан тамомлади ва турнир жадвалида 6-поғонадан жой олди. Нима деб ўйлайсиз, жамоанинг кўрсатган ўйини барчасига мос тушдими?

- 6-ўринга мос эмасдик. Биз юқори ўринларга курашгандик. Ҳар бир ўйиндан кейин мураббийлар яхши ўйнадик дерди ва бизга кўрсатмаларни айтишарди. Сиз ҳам кўрган бўлсанглар, чемпионатда 6-ўринда якунлашга мос келадиган ўйин кўрсатмагандик. Жамоамизнинг салоҳияти бундан кўпига арзирди. Аммо кераксиз жойда очколарни йўқотганимиз, 90-дақиқагача ютиб туриб, ундан кейин ютқазган ёки дуранг ўйнаган пайтларимиз бўлди. 2-3 та ўйин натижамизга халақит қилди, деб ўйлайман.

диёр4

- Ўйиндан олдин Секейранинг “Локомотив”дан кетгани охирги турда жамоа ўйинига ҳам таъсир қилса керак, деб ўйлагандик. Португалиялик мураббийнинг кетишини жамоа қандай қабул қилди? Шахсан сизни муносабатингиз қандай бўлди?

- Секейра яхши мураббий эди. Жамоада ажойиб ишлади. Бизга европача ўйиннинг қайсидир жиҳатларини олиб кирди. Бунга аминман. Кетиши аниқ бўлганидан кейин ортга қайтариб бўлмасди. Бу хаёл билан яшаб бўлмайди. Жамоамиз учун чемпионатдаги охирги ўйин эди. Балки келаси мавсумда кимдир “Локомотив”да бўлмас. Шу сабабли ўзимиз учун яхши ўйин кўрсатишга келишиб, барчамиз ҳаракат қилдик. Охирги марта ўйнайлик, натижа кўрсатайлик, деб майдонга тушдик. Чунки боя айтганимдек, эртага кимдир бу клубда бўлади, яна кимдир йўқ.

- Бизни қизиқтираётган савол: 2022 йилда ҳам Диёр Туроповни “Локомотив”да кўрамизми?

- Бу саволингизга жавобни очиқ қолдираман. Ҳозир бирор нарса дея олмайман.

диёр3

- Лекин айни пайтда сиз учун таклифлар бор...

- Ҳа, шунақа деса ҳам бўлади.

- Шартномангиз тугаяпти-а?

- Ҳа, шу йил тугайди.

- Имкониятларингизни яхши биламиз. Шундай экан, кейинги мавсумда сизни легионер сифатида ҳам кўришимиз мумкинми ёки бор эътиборингизни ўзимизни чемпионатга қаратганмисиз?

- Бу нарса режамда бор. Шу ҳақида ҳам ўйлаб турибман. Лекин ҳали барчаси ойдинлашмаган. Шунинг учун аниқ гап айта олмайман. Барчаси аниқ бўлганидан кейин нимадир десам мантиққа тўғри келади.

диёр2

- “Локомотив”да сиз учун аламли ва ёқимли ўйинлар сифатида қайси беллашувларни айтган бўлардингиз?

- Менимча, бу йил аламли ўйинлар кўп бўлди. Ўз майдонимизда АГМК билан дуранг ўйнадик. Ўшанда рақиб охирги дақиқаларда гол урди. Мен эса сариқ карточкаларим тўрттага етгани учун ўйнамасдан четдан кузатдим. Шу учрашув аламли бўлди. Ҳар бир ғалаба эса ёқимли бўлади. Энг ёқимлиси? Ўз майдонимизда “Сўғдиёна” устидан ғалаба қозонганимиз бўлса керак. Кубок баҳсида бу рақибга қарши охирги дақиқаларда гол ўтказиб аламли тарзда ютқазгандик. Чемпионатда эса ўша мағлубиятга лойиқ эмаслигимизни кўрсатиш учун ўйнадик ва ютдик.

- “Сўғдиёна”нинг иккинчи ўринни эгаллагани сиз учун кутилмаган янгилик бўлмадими?

- Йўқ, кутилмаган янгилик бўлмади. Бунга оддий қарадим. Тақвим ҳам қизиқарли тузилган экан, деб ўйладим. Совринли ўринлар учун ва лигада қолиш учун курашаётган жамоалар ўртасидаги кураш қизиқ кечди.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию