Ойбек Касимов - Ўзбекистон Миллий олимпия қўмитаси бош котиби!

Бугун Ўзбекистон Миллий олимпия қўмитасининг навбатдан ташқари XXXVII Бош Ассамблеяси бўлиб ўтди. Унда Жисмоний тарбия ва спорт вазири Дилмурод Набиев, МОҚ президенти Рустам Шоабдураҳмонов, Ўзбекистон Республикаси Президенти администрацияси (ЎзРПА) масъул ходими Шавкат Султонов, МОҚ вице-президентлари Азизжон Камилов ҳамда Сакен Полатов, Ижроқўм вакиллари ва ОАВ ходимлари иштирок этишди. Бу ҳақда МОҚ матбуот хизмати хабар берди.

Йиғилиш кун тартибидаги асосий масала МОҚ Бош котиблигига номзод сайлаш эди. Рустам Шоабдураҳмонов мазкур лавозимга соҳада катта тажрибага эга бўлган Ойбек Омилович Касимов номзодини илгари сурди. Ассамблея иштирокчилари бир овоздан номзодни қўллаб-қувватлашди ва Ойбек Касимов Миллий олимпия қўмитасининг Бош котиби лавозимига сайланди.

Ассалому алейкум, қадрли Ассамблея иштирокчилари. Кўриб турибман, бу жойда бегона инсон йўқ. Барчамиз Рио Олимпиадасига тайёргарлик жараёнида елкама-елка ишлаган эдик. Бунгача 2 йил вазирликда спортимиз ривожи йўлида қўлдан келганча ишладим. Бу жой мен учун бегона эмас. Аминманки, давлатимизнинг қўллаб-қувватлаши ва ёрдами билан Токио-2020 Олимпиадасидан халқимиз ва муҳтарам Президентимизни хурсанд қилган ҳода юзимиз ёруғ бўлиб қайтамиз, – деди Ойбек Касимов.

Ойбек Омилович Касимов 1980 йил Тошкент шаҳрида туғилган. Фаолияти давомида “Пахтакор” футбол клуби, Тошкент шаҳар футбол федерацияси, Миллий олимпия қўмитаси ҳамда Жисмоний тарбия ва спорт вазирлигида турли лавозимларда фаолият олиб борган. Рио Олимпиадасидан сўнг кўрсатган хизматлари учун давлатимиз томонидан «Дўстлик» ордени билан тақдирланган.

Ассамблея давомида бир қатор федерация мутасаддилари, жумладан, Ўзбекистон гимнастика федерацияси раҳбари Руслан Мустаев, ЎФА бош котиби Аваз Максумов, Жисмоний тарбия ва спорт вазири Дилмурод Набиев, ЎзРПА масъул ходими Шавкат Султонов сўз олиб, Ойбек Касимов ҳақида ўз фикрларини билдириб ўтишди.

Тадбир якунида МОҚ президенти Рустам Шоабдураҳмонов юртимизда оммавий спортни тарғиб қилиш, Токио Олимпиадасига тайёргарликни янада кучайтириш ва бу борада муҳтарам Президентимизнинг жисмоний тарбия ва спорт ривожини ҳар томонлама қўллаб-қувватлаб келаётгани борасида гапириб ўтди.

Олдимизда Токио-2020 ёзги Олимпия ўйинларига спортчиларимизни муносиб тайёрлаш, терма жамоаларимизга барча шароитларни яратиб бериш вазифаси турибди. Япониядаги Олимпиада стартига эса бор йўғи 163 кун вақт қолди. Айни пайтда давлатимиз Олимпиадага тайёргарлик бўйича бизни ҳар томонлама қўллаб-қувватлаб келмоқда. Хусусан, спорт федерацияларида шифокор, диетолог, психолог, массажчи, матбуот-котиби каби янги штатлар очилди ва бу борада мутахассислар енг шимариб ишга киришишди. Умид қиламизки, яқинлашиб келаётган Олимпиадада спортчиларимиз бундай эътиборга ўз ғалабалари билан муносиб жавоб қайтаришади, – деди Рустам Шоабдураҳмонов.

Шунинг билан, Ўзбекистон Миллий олимпия қўмитасининг навбатдан ташқари XXXVII Бош Ассамблеяси ўз ишини якунлади.

Ўзбекистон Миллий олимпия қўмитаси Ойбек Касимовнинг янги, айтиш жоиз бўлса, қадрдон лавозимига қайтгани билан яна бир бор муборакбод этади ва янги Бош котибнинг фаолияти давомида куч-ғайрат ва улкан муваффақият тилаб қолади.