"Ўйнашади анжанчасига" ёхуд "Бобур Арена"да нималар рўй берди?

“Андижон”нинг “Бунёдкор”га қарши ўзаро ўйинлар статистикасида “Бургутлар”га ҳали “Қалдирғочлар” устидан ғалаба қозониш насиб қилмаётганди. Бу сафар Александр Хомяков жамоаси қора анъанасига барҳам берди.

10 март санасида “Бобур Арена”даги ўйинда кутилганидек қайноқ атмосфера шукуҳи сезиб юрди. Бу андижонликларнинг ушбу мавсумда ўз майдонидаги биринчи, очилиш ўйини эди.

Мезбонлар шу куни ҳар жиҳатдан меҳмонлардан устунлигини амалда кўрсата олди. Ғалабага бўлган иштиёқ ва чанқоқ футболчиларда кучли эди. Қолаверса, андижонлик ишқибозларнинг жон бериб қўллаб-қувватлашлари, ўзгача яратилган перформанслари ҳам “Андижон” аъзоларига қўшимча куч бағишлади. Натижада дастлабки 10 дақиқа якунланмасиданоқ стадион майдон эгаларининг голидан ларзага келди. Бу вазиятда Бектемир Абдуманнонов голнинг яратилишида катта ҳажмдаги ишни бажарди. У майдон марказидан кириб келди ва рақибларини ортда қолдириб, жарима майдони ичидаги Лука Згурскийга тўпни оширди. Ўз навбатида россиялик ҳужумчи жорий мавсумдаги “Андижон”нинг ҳамда ўзининг илк голини киритишга муваффақ бўлди.

32-дақиқада меҳмонлар легионери ҳисобни тенглаштирди. Аммо ушбу гол инобатга олиниши учун анча вақт керак бўлди. ВАР ҳакамлари обдон таҳлил қилишди ва якунда гол инобатга олинди. Аммо ушбу жараён давом этаётган маҳалда “Бунёдкор” майдонда бир киши кам бўлиб қолди. Усмонали Исмоналиевга бош ҳакам ноўрин ҳатти-ҳаракати учун қизил карточка кўрсатди. “Андижон” эса тезда вазиятни ўзгартира олди. Бурчак зарбасидан узатилган тўпни ҳимоячи Владимир Бубанья кўкраги билан дарвозага жойлаб қўйди. Ҳакам томонидан тўхталишлар учун биринчи бўлимга 11 дақиқа вақт қўшиб берилди. Шунинг ичида “Бургутлар” учинчи голни ҳам киритишди. Стандартдан кейин жарима майдони ичида яна бир ҳимоячи Ислом Маматказин дарвозани ишғол қилди ва у голини Макгрегорча нишонлади.

Танаффусдан кейин ҳам ташаббусни ўзида сақлаб турган “Андижон” қатор голли имкониятларга эга бўлди. Албатта, орада “Андижон” дарвозабони Игорь Литовка ҳам рақибнинг зарбаларини қайтариб турди. Лекин, барибир голга тортадиган ўта хавфли ҳужумлар мезбонлар томонидан содир этилди. 85-дақиқада Муҳаммадкарим Тоиров ўзининг чиройли зарбаси билан ҳисобни 4:1 га етказган бўлса, орадан кўп ўтмай захирадан ўйинга қўшилган легионер Армин Бошняк ҳам жорий мавсумдаги илк голини урди ва учрашувга нуқта қўйди. Қизиғи, Бошняк ўтган йили ҳам “Андижон”даги дастлабки голини “Бунёдкор” дарвозасига киритган.

Беллашувдан кейин “Андижон” футболчилари тарихий ғалабасини жонкуяр мухлислари билан биргаликда нишонлади ва бундай онлар ўзгача завқли онларни тақдим этди.

“Андижон” навбатдаги 3-турни 16 март куни Тошкентда “Сурхон”га қарши ўтказади.    

“Андижон” – “Бунёдкор” – 5:1 (3:1).

10 март. Андижон. “Бобур Арена” стадиони. 10140 томошабин.

Ҳакамлар: Азиз Асимов, Никита Афиногенов, Шохнур Йўлдошев.

Захира ҳаками: Исроил Имомназаров

ВАР: Ильгиз Танташев

АВАР: Максим Нехочин

“Андижон”: Игорь Литовка, Ислом Маматказин, Владимир Бубанья (Илдар Маматказин, 86), Абдувоҳид Ғуломов, Муҳаммадкарим Тоиров, Шерзод Эсанов, Сардор Азимов, Фарҳод Бекмуратов (Леван Арвеладзе, 69), Фарҳод Соҳибжонов (Армин Бошняк, 63), Бектемир Абдуманнонов (Демир Имери, 63), Лука Згурский (Шахром Самиев, 63).

“Бунёдкор”: Марин Любич, Маҳмуджон Муҳаммаджонов, Нажмиддин Нормуродов (Фарҳод Ўткуров, 71), Самир Желкович, Музаффар Олимжонов (Билол Туплиев, 77), Фране Киржак (Рустам Азимов, 56), Усмонали Исмоналиев, Азизбек Тўлқинбеков, Миржаҳон Мираҳмадов (Расул Йўлдошев, 46), Темурхўжа Абдуҳолиқов, Тони Йович (Амир Тўрақулов, 56).

Голлар: Лука Згурский, 7- 1:0. Самир Желкович, 32 – 1:1. Владимир Бубанья, 42 -2:1. Ислом Маматказин, 45+5 – 3:1. Муҳаммадкарим Тоиров, 85 – 4:1. Армин Бошняк, 89 – 5:1.

Огоҳлантиришлар: Сардор Азимов, 10. Абдувоҳид Ғуломов, 71 – Темурхўжа Абдуҳолиқов, 64.

Четлатиш: Усмонали Исмоналиев, 34.