Ўз уйида "меҳмон", Фарғонада супер ўйин ёхуд 4-санада 4-турга старт берилади

4 апрель куни Суперлиганинг 4-тури бошланади ва 6 апрелга қадар давом эттирилади. Фақат бу сафар 7 та жуфтлик иштирокидаги учрашувларга гувоҳ бўламиз. “Қизилқум” – “Хоразм” учрашуви бошқа муддатга қолдирилди.

4 апрель.

18:00. “Бухоро” – “Бунёдкор”

Бошланиши Б ҳарфи билан юритиладиган жамоалар иштирокидаги беллашув ўзига хос аҳамиятга эга. “Бунёдкор” клуби мағлубиятсиз одимламоқда ва ҳисобида 7 очко бор. “Бухоро” гарчи мағлубият билан бошлаган бўлса-да, кейинги иккита турда ишончли ғалабаларга эришди. Ҳар икки клуб жорий мавсумда ўзларидан яхши таассурот қолдиришаётгани эътиборга молик. “Бухоро” ҳам, “Бунёдкор” ҳам жанговар ўйин намойиш этишмоқда. Одатда, бу каби жамоалар ўртасидаги ўйин ғоят шиддатли ҳамда қизиқарли руҳда ўтади.

20:15. “Сурхон” – “Қўқон-1912”

Иккала жамоа ҳам чемпионатда ҳозирча ғалаба нималигини билмаяпти. Про лигадан қайтган қўқонликларда ғалаба бўлмаганига яраша мағлубият ҳам йўқ. Учта ўйинда учта дуранг ўйнашди. “Сурхон”да эса натижалар ёмон. Барча ўйинда мағлубиятга учради. Бу сафар термизликлар учун яна бир имконият. Ўз майдонида, мухлислари қаршисида майдонга тушишади. “Қўқон-1912” илк бор олис сафарга чиқади. Бунгача учта турни асосан ўз ҳудудида ўтказди. Икки марта Қўқонда ва бир марта Фарғонада “Нефтчи”га қарши баҳс олиб борди. “Сурхон” руҳий ўрага тушиб қолгани боис ундан қутулиши қийин бўляпти. Қўқонликлар ҳам дастлабки ғалабаси учун курашади. Бироқ “Сурхон” майдонида бир очко қўлга киритадиган бўлса ҳам бунинг учун улар ортиқча танқид қилинмаса керак.

5 апрель.

19:30. “Нефтчи” – “Навбаҳор”

Турнинг марказий ўйини. Фарғонадаги “Истиқлол” стадионида водий дербиси бўлиб ўтади. Чемпионлик учун асосий даъвогарлардан саналган “Нефтчи” учта турда учта дуранг ўйнаб қўйди. “Навбаҳор” эса бир ғалаба ва икки дурангга эга бўлиб турибди. Ғалабага ташна бўлиб турган фарғоналикларни энди дуранг қониқтирмайди. “Навбаҳор” ўтган турда ҳам водий дербисида иштирок этган ва ўз уйида “Андижон”га қарши учрашувда охирги дақиқада ғалабани қўлдан чиқарган. Навбатдаги дербида энди фарғоналикларда босим кўпроқ бўлади. Шундоқ ҳам ҳар турда “Нефтчи”да кучли босим сезиляпти ва бу табиий. Бундай қимматли ва юлдузли таркиб билан ҳар бир ўйинда ғалаба қозониши шарт бўлиб қолган. Дербида ҳозирча имкониятлар тенг. Қолганини ўйинда кўрамиз.

20:15. “Шўртан” – “Насаф”

Бу ёқда водий дербиси, у ёқда эса воҳа дербиси. “Шўртан”нинг уй аренаси таъмирланаётгани сабабидан Қаршидаги “Марказий” стадиондан фойдаланяпти. Шу боис “Насаф”га қарши баҳсда “Шўртан” номинал мезбон мақомида, “Насаф” эса уйида “меҳмон” ролида. Суперлигада гол урмаган биргина “Шўртан” қолди. Анвар Бердиев жамоаси учун навбатдаги учрашув янада оғир ўтиши маълум. Таркиб, ўйин ва ном жиҳатидан “Насаф”нинг фаворитлигига ҳеч кимда шубҳа йўқ. “Шўртан” ўтган турда Қўқонда дастлабки очкосини қўлга киритди. Дербида жиддий кураш кечади, аммо тажриба кўп нарсани ҳал қилса керак.

6 апрель

17:45. “Андижон” – “Машъал”

Учта турда учта дуранг ўйнаган “Андижон” клуби бу сафар Муборакнинг “Машъал” жамоасини қабул қилади. 2 апрель куни “Машъал” Тошкентда қолдирилган ўйин доирасида “Пахтакор”га 5:0 ҳисобида ютқазди ва улар Андижонга қандай кайфиятда келишларини тасаввур қилиш қийин эмас. Афтидан, жамоа аъзолари 29 март куни Жиззахда “Сўғдиёна” устидан қозонилган ғалабада (1:0) бор куч ва имкониятларини ишга солиб юборган кўринади. “Андижон” мавсумдаги биринчи ғалабасини қўлга киритиш учун яхши имкониятга эга.

18:00. “Сўғдиёна” – “Пахтакор”

Бу жуфтлик ҳам турнинг қизиқарли ўтиши кутилаётган беллашувлардан бири. “Сўғдиёна” кутилмаганда стартни жуда ёмон бошлади ва учта турда учта мағлубият! “Пахтакор” ҳам иккита турда икки марта ютқазиб, яхши бошлай олмаганди. 2 апрель куни 1-турнинг қолдирилган учрашуви доирасида “Машъал” билан учрашувда бор аламини олди ва жавобсиз 5 та гол урди. “Пахтакор”га қарши учрашувда майдонда чинакам жанг бўлади. “Сўғдиёна”да гарчи омадсизлик бўлса-да, “Пахтакор”га қарши беллашув учун мотивация етарли бўлса керак. Бу баҳсда мураббийларнинг тактикаси ҳамда тайёргарлиги кўп нарсани ҳал қилади.

20:15. ОКМК – “Динамо”

Мусобақа пешқадами – ОКМК бу сафар Самарқанднинг “Динамо”сини қабул қилади. Учта турда учта ғалаба эришган Миржалол Қосимов жамоасини осон бўлмаган учрашув кумоқда. Чунки Вадим Абрамов ҳар қандай рақибга қарши ҳимояга чекинадиган эмас, балки ҳужумкор услубин қўллайди. Шу орқали улар Наманганда ғалабани қўлдан чиқариб дуранг ўйнади. Уйида “Машъал”ни, Тошкентда эса “Пахтакор”ни ютди. Ўз навбатида самарқандликлар учун ОКМКга қарши бўладиган ўйин оғир ўтади. Мураббийлар бир-бирини яхши билишади. Томошабоп ўйин кечиши катта эҳтимол.