Ўзбек футболчиси: “Ювентус” таклифини қабул қилмаганим катта хато бўлди!

Кучли бешлик чемпионатларидан бири – Италия лигаларида ўйнаган биринчи ўзбек футболчиси Илёс Зейтуллаев ҳисобланади. Орадан йигирма йилдан кўпроқ вақт ўтиб, яна икки нафар вакилимиз кучли бешлик лигаларига қўшилди. Элдор Шомуродов уч йилдан бери А Серияда ўйнаётган бўлса, Абдуқодир Ҳусанов яқиндагина Франция вице-чемпиони “Ланс” сафидан қўним топди.

Илёс Зейтуллаев “РБ Спорт” нашрига интервью бериб, футбол ишқибозларини қизиқтирадиган кўплаб масалаларга ойдинлик киритиб берди.

Sports.uz портали ушбу интервьюдан парчаларни ўзбекистонлик мухлислар эътиборига ҳавола этади.

- Сизни Россияга чорлай бошлашди...

- Ҳа. Мен катта хатога йўл қўйдим. Ёшлик қилдим. Бизга Россиядан шартномалар ва пулларни ваъда қилишди. Лекин вақт ўтиши билангина биз дунёнинг энг зўр клубларидан бирига тегишли бўлганимизни англаб етдим. Чалғимасдан, ўз йўлимиздан кетишимиз керак эди.

Эсимда, ўшанда мени “Ювентус” раҳбарларидан Лучано Моджо суҳбатга чақирган эди. У менга “Илёс, сиз уч йилдан бери клубимиз тизимидасиз. Ҳаммаси яхши кетяпти. Ҳозир бошқа жамоалар ҳақида ўйлашнинг мавриди эмас. Биз билан шартномани узайтиринг, сизни кузатиб борамиз. Ижарага жўнатамиз. Асосий таркибга лойиқ бўлганингизда яна ортга қайтарамиз. Асосийси, хатога йўл қўймаслик”, деган эди.

Мен унинг гапларига қулоқ солмадим. Бу “Ювентус”га ёқмади. Улар мен билан шартномани узайтирмади.

- Сиз пуллар ҳақида гапирдингиз. Ўшанда сизнинг ёшингиздаги ўйинчилар “Ювентус”да қанча оларди?

- Ҳаммаси  ҳар хил. Лекин кўп эмас. Бир неча минг евро холос. Лекин бизнинг тураржой ва овқатимиз ҳам тўланарди. Агар ўзингни кўрсатсанг, маошни ҳам кўтаришарди. Лекин бунинг учун керак эканингни доим исботлашинг шарт эди.

- Сизга Россия терма жамоаси учун ўйнаш таклифи бўлганми?

- Ҳа, таклиф бўлган. Жуда жиддий. Лекин мен Ўзбекистон терма жамоаси учун ўйнашни маъқул топдим. Бу мамлакатда ўсиб-улғайганман.

- “Ювентус”дан кейин Италиянинг саккизта клубини алиштирдингиз. Ўзингизни қайси жамоада энг яхши ҳис қилгансиз?

- Қайсинисида ўйнаган бўлсам, ўшанда. “Ювентус”дан “Реджина”га ўтдим. Бу ҳам жуда кучли жамоа эди. Майдонга туша бошладим, “Интер” ва “ювентус”га қарши ўйнадим. Кейин оғир жароҳат олдим. Жиддий операция бўлди. “Реджина”дан кетишга мажбур бўлдим.

Ўша пайт Гасперини В Серияга “Кротоне”га таклиф қилди. Жароҳат туфайли фаолиятимни тугатсам керак, деб ўйлаб юргандим. Гасперини мени оёққа турғазди. Формамни тиклаб олдим, асосий таркибда ўйнадим. Кейин мени “Женоа”га олиб кетишди. Бу давр мен учун жуда яхши ўтди. Лекин яна жароҳатга йўлиқдим. Аслида операциянинг асорати фаолиятимга таъсир қилган эди.

- “Верона”да йўлингиз Маурицио Сарри билан кесишди...

- Ярим ҳазил воқеа бор. Биз С Серияда ўйнардик, вазифа – В Серияга чиқиш. Саккизта учрашувдан кейин охиридан битта юқори ўринда бораётган эдик. Мухлислар бизни ўлдиришга ҳам тайёр эди. Вазиятни ўнглаш учун Сарри келди. Кийим алмаштириш хонасига оғзида сигарет билан кирди. Бутсаларимизни кўздан кечирди.

- Кимнинг бутсаси рангли бўлса, менинг жамоамда бир сония ҳам ўйнамайди, - деди.

Биз ҳаммасини тушундик. Унинг даражасини билиб олдик.Унинг бошчилигида таҳлил, психолигия, техник-тактик ҳаракатлар, ўйиннинг барча омиллари юқори даражада ишлади. У фаолиятимдаги энг кучли мураббийлардан.

- Сиз 2014 йили фаолиятингизни тугатдингиз. Нега Италияда қолишга қарор қилдингиз?

- 2011 йили ҳаёт тубдан ўзгарди. Рафиқамни учратдим. Отамнинг изидан бориб, мураббий бўлиш истаги пайдо бўлди. Болалар футболидан бошладим. Кейин лицензия олдим. Ҳозир бешнчи дивизионда “Виртус Купелло” бош мураббийиман. Тажриба тўплаяпмиз. Юқори дивизионларга чиқишга умид қиламан. Жуда оғир бўлади. Ўз йўлимдан кетаман.

Таниқли легионеримиз: Мени Анчелотти машғулотга жалб қилди!

Легионеримиз: “Бордо”, “Фейеноорд”га борганман, лекин мени “Ювентус” олди!

Шомуродов: Мессига ҳеч қандай алоқам йўқ! (фото)

Премьер-лига клуби тез орада ўзбек футболчиси трансферини эълон қилади