Таниқли легионеримиз: Мени Анчелотти машғулотга жалб қилди!

Кучли бешлик чемпионатларидан бири – Италия лигаларида ўйнаган биринчи ўзбек футболчиси Илёс Зейтуллаев ҳисобланади. Орадан йигирма йилдан кўпроқ вақт ўтиб, яна икки нафар вакилимиз кучли бешлик лигаларига қўшилди. Элдор Шомуродов уч йилдан бери А Серияда ўйнаётган бўлса, Абдуқодир Ҳусанов яқиндагина Франция вице-чемпиони “Ланс” сафидан қўним топди.

Илёс Зейтуллаев “РБ Спорт” нашрига интервью бериб, футбол ишқибозларини қизиқтирадиган кўплаб масалаларга ойдинлик киритиб берди.

Sports.uz портали ушбу интервьюдан парчаларни ўзбекистонлик мухлислар эътиборига ҳавола этади.

- Сиз бошидан асосий таркиб билан шуғуллангансизку...

- Ҳа. Биз келганимизда бош мураббий Карло Анчелотти эди. У бизни машғулотларга жалб қилди. Ўшанда Зинедин Зиданни ҳали “Реал”га сотиб юборишмаган эди. Кейин бош мураббийликка Липпи келди. У билан ҳам биринчи жамоада шуғулландик, мисол учун, унинг назоратида икки томонлама ўйин ўтказганмиз.

- Ҳозир Будянский ва Коваленко билан алоқа қиласизларми?

- Ҳа, собиқ футболчиларнинг гуруҳи бор. Ёзишамиз, қўнғироқлашамиз. Дўстона алоқаларимиз сақланиб қолган. Витя футболни эрта тугатган ва ҳозир бизнес билан машғул. У футболдан 26-27 ёшида кетди.

- “Ювентус” асосий таркиби билан шуғуллангангизда ким кўпроқ ҳайратга солган?

- Паоло Монтеро — уругвайлик ҳимоячи. Майдонда у жуда баджаҳл эди. Майдондан ташқарида эса, умуман бошқа одамга айланарди. Ҳеч эсимдан чиқмайди, биз базага кетаётган эдик. Ёмғир, кўча лой эди. Машинасида олдимизда тўхтади ва олиб бориб қўйишини айтди. Бизга ноқулай бўлди, шарт эмас,  дедик. У бизни кўндирди. Ёшларга жуда яхши муносабатда эди. Ҳаммаси мавқеи ва тажрибасига қарамай, одамийлигини йўқотмаган. Аллесандро дель Пьеро, Зинедин Зидан ва бошқалар ҳам шундай эди.

- Дель Пьеро билан бунақа воқеалар бўлмаганми?

-  У бизга машғулотларда жуда кўп ёрдам берарди. Машғулотлардан кейин қолиб, у бизга жарима зарбасини қандай тепиш, оёқни қандай қўйиш усулларини ўргатарди. Ҳаммасини хотиржам тушунтирарди, овозини кўтармас эди. “Ювентус” бир оила, дер эди. Оилада ҳамма тенг, ёшингни аҳамияти йўқ. Сен жамоа аъзосимисан, худди шундай муамала қилишади.  “Ювентус”нинг муҳити шундай бўлган. Зидан ҳам ўзини хотиржам ва оддий тутарди. Бирор нима сўраши, қизиқиб кўриши мумкин эди.

- Энг ғалати футболчи ким бўлган?

Давидс. У ҳақиқатан ғалатироқ эди. Ҳар доим қулоқчин тақиб юрар ва ўзи билан ўзи овора эди. У ҳаммага нисбатан ўзини шундай тутарди. Худбинроқ эди, бошқаларга гап ўтказишга уринарди. Бошқалар ҳақида бундай деёлмайман.

- Марчелло Липпи ҳақида нима дея оласиз?

- У ҳар доим жамоанинг кайфиятини юқори даражада ушлаб турарди. “Ювентус”нинг тақвими ҳар доим жуда тиғиз бўларди ва матбуот тинимсиз босим қиларди. Мободо дуранг ўйнаб қўйсак, ҳамма инқироз ва муаммолар ҳақида бонг ура бошларди. Липпи ҳар доим  жамоадан босимни олиб ташлашга уринган. Жамоада катта профессионаллар йиғилганини биларди. Бунақа жамоада энг асосий омил – психология. Уларнинг ҳаммаси футбол ўйнашни биладиган йигитлар эди.

- Липп қўл остида Италия кубогида дебют қилгансиз...

- Ҳа, ўшанда хатто итальянчани тузук гапира олмасдим. У менга икки-учта гап айтди, ҳаммаси тушунарли бўлди.

- “Ювентус” асосий таркибида иккита ўйин ўтказгансиз, иккиси ҳам кубок доирасида бўлган. Нега бунча кам?

- Сиз кам деяпсиз, лекин мен қандай қилиб, асосий таркибда иккита ўйин ўтказишга эришдингиз, ахир жамоа тўла юлдузлар эдику, деб сўраган бўлардим. Менга шундай жамоада ярим дақиқа ҳам кифоя қиларди.

- Бу фикрга қўшиламан.

- Ҳозир бунга ишониш қийин. Мен майдонга буюк юлдузлар билан бирга тушганман. Ўшандан кейин мен кўп хатога йўл қўйдим ва асосий таркибни ушлаб қола олмадим. Баъзан, ишга бўлган муносабатни ўзгартирдим. Бошидаги иштиёқни йўқотиб қўйди. Кейин ҳаётимга ўзгаришлар кириб келди, Россиядан таклифлар, пуллар, дегандай.

- Сиз асосий таркибдаги икки учрашувдан кейин яна ёшлар жамоасида ўйнадингизми?

- Ҳа. Кейин ҳам бир неча марта кубок ўйинларига боргандирман. Асосий таркиб билан машғулот ўтадим, лекин улар билан бошқа майдонга тушмадим. Жой топишим қийин эди. У пайт захирадан атиги учта ўйинчи тушириларди. Таркиб юлдузларга тўла эди. Давидс, Трезеге каби ўйинчилар захирада ўтирганида бизга йўл бўлсин.

Легионеримиз: “Бордо”, “Фейеноорд”га борганман, лекин мени “Ювентус” олди!