Ўзбекистон - КХДР: сўнгги бешта қарама-қаршиликлар натижаси қандай бўлган?

"ЖЧ-2026" саралашнинг учинчи босқичи старт олиш арафасида. Унга кўра, 18 жамоа уч гуруҳга 6 тадан бўлинган холда баҳслашади. Баҳслар уйда-меҳмонда форматида бўлиб, ҳар бир жамоа ўнтадан қарама-қаршиликда иштирок этади. Гуруҳларда биринчи ва иккинчи ўринни эгаллаган жамоалар тўғридан-тўғри мундиал йўлланмасига эга бўлади. 

Терма жамоамиз учун саралашнинг учинчи босқичи 5 сентябрь куни Корея Халқ Демократик Республикасига қарши баҳс билан бошланади.

Жамоалар умумий ҳисобда ўзаро 9 маротаба тўқнаш келган. Уларнинг олтитаси ҳамюртларимиз фойдасига ҳал бўлган бўлса, КХДР вакиллари атиги бир маротаба ғалабани қўлга киритган. Битта беллашувда жамоалар кучи тенг келган. Голлар нисбатига тўхталадиган бўлсак Ўзбекистон рақибларидан тўққиз тўп фарқи билан олдинда: 16:7.

Томонлар сўнгги маротаба 2019 йил 7 июнь санасида халқаро ўртоқлик учрашувида тўқнаш келган. Ўшанда термамиз аъзолари Шарқий Осиё вакилларини йирик 4:0 ҳисобида мағлуб этишган. Голларга Одил Аҳмедов (28), Темурхўжа Абдухолиқов (65), Игорь Сергеев (68) ва Достонбек Турсуновлар (90+2) муаллифлик қилишган.

Бундан олдин икки жамоа вакиллари 2018 йилнинг октябрида ҳам куч синашишган. Бу баҳсда ҳам термамиз футболчилари ўз дарвозаси дахлсизлигини сақлаган ҳолда, Марат Бикмаевнинг дубли эвазига зафар қучган.

27.04.2018 йил. Ўзбекистон 2:2 КХДР (Ўртоқлик учрашуви)

12.11.2015 йил. Ўзбекистон 3:1 КХДР (Жахон чемпионати саралашнинг иккинчи босқичи)

16.06.2015 йил. КХДР 4:2 Ўзбекистон (Жахон чемпионати саралашнинг иккинчи босқичи)

Саралаш босқичининг навбатдаги ўйинида ҳам терма жамоамиз футболчилардан йирик ҳисобдаги ғалабани кутиб қоламиз!

                         Жаҳонгир Иномжонов