Ўзбекистон "CAFA"да ғолиб бўлиши шартми? Катанец идеал таркиб йиғдими? Жаъфар Ирисметов терма жамоамиз ҳақида нималарни айтди?

Юртимизда "CAFA Nation’s Cup" халқаро мусобақаси бошланмоқда. Ўзбекистон миллий терма жамоамиз “А” гуруҳида Уммон, Тожикистон ва Туркнманистон билан баҳс олиб боради.

Бу ўзига яраша қизиқ турнир ва мухлислар ҳам интилик билан кутишяпти. Мусобақа олдидан таниқли футбол мутахассисларидан бири, терма жамоамиз собиқ аъзоси Жаъфар Ирисметов Sports.uz учун фикрлари билан ўртоқлашди.

Ушбу турнирдан нима кутяпсиз?

- Албатта, Марказий Осиё терма жамоалари иштирокида ушбу мусобақани ўтказилиши зўр нарса. Биринчидан, миллий терма жамоамиз ўз мухлисларимиз қаршисида ўйнайди. Иккинчидан, термамизга бу каби учрашувлар жуда керак. Мини-турнирлар орқали мураббийларда барча футболчиларнинг имкониятини кўриб олиш фурсати бўлади. 3 та ўйин бўлса, мураббийлар таркибда бемалол ротация қилиб ўйинчиларни кўриб олишлари мумкин бўлади. ФИФА кунлари бўлса иккита ўйин ташкил қилинади, мураббий кўп нарсага улгурмаслиги мумкин. Бу мусобақа эса мураббийларга плюс. Бундан ташқари, мухлисларимизга ҳам жуда қулай. Бу турнирни ўтказилаётганини ижобий баҳолайман. Гуруҳимизга келадиган бўлсак, Уммон, Туркманистон ва Тожикистон бор. Анчадан бери қўшниларимиз билан ўйнамадик. Айниқса, Туркманистон кабиларни ҳозир даражаси қандайлигини тўлиқ билмаймиз. Биз ҳар доим улардан кучлироқ бўлганмиз. Уммон билан бўладиган учрашув ҳам қизиқ ўтади. Аммо Тожикистон билан Туркманистонни ҳам ҳисобдан чиқариш керак эмас. Нариги гуруҳда Эрон кучли. Бир сўз билан айтанда, бу керакли турнир.

Терма жамоамиз "CAFA"да ғолиб бўлиши шартми?

- Тўғрисини айтсам, шарт дея олмайман. Лекин ҳар қандай ўйинларда футболчиларда мотивация бўлади. Майдонга чиққандан кейин барибир натижа қилишлари керак, айниқса, ўз мухлисларимиз қаршисида. Фикримча, бундай мусобақаларда кўпроқ термага номзод футболчиларни кўриб олгани яхши. Кўпинча асосий ўйинчиларимизга имконият берилади, захирадигаларга камроқ. Менимча, таркибни ҳар хил кўринишда ўйнатиб кўрса ҳам яхши бўлади. Нима қилишни мураббий ўзи билади. Янги келган йигитларни ҳам ўйнатса яхши бўларди. Масалан, Аббос Файзуллаев ҳам қўшилган. Албатта, ишқибозларимиз олдида 1-ўринни олса хурсанд бўламиз. Ҳар қандай ҳолатда ҳам доимо терма жамоамиздан ғалаба кутамиз.

Асосий рақобатчимиз ким?

- Ўйлашимча, бизга кўпроқ Уммон жиддий қаршилик кўрсатади. Кейин Тожикистон ва ундан сўнг Туркманистон. Барибир қўшни терма жамоалар ҳам ўзларини кўрсатгиси келади. Биласиз, қўшни деганда бу дерби мақомидаги учрашувга айланади. Уларни ҳам ҳисобдан чиқармаган ҳолда айтишим мумкинки, гуруҳимизда Уммонни асосий рақобатчимиз деб ўйлайман.

Таркиб идеал кўринишдами?

- Менимча, таркибга ҳамма ўйинчилар жалб қилинди, деб ҳисоблайман. Катанец ўзига керакли футболчиларни чақирди. Бир-иккита иқтидорли ёшларни қўшилиши ҳам яхши бўлди. Янги футболчиларимизни шунчаки чақирмасдан уларга ҳам ўйинларда имконият берилса янада яхши бўларди. Сречкони уни олди ёки буни олмади, деб айта олмайман. Уни ёрдамчилари бор ва мендан кўра яхшироқ билишади. Балки кимнидир жароҳати бордир ёки яхши спорт формасида эмасдир. Бу борада терма жамоа мураббийлари яхши биладилар. Фақат Элдор Шомуродовни “Специя”ни плей-офф ўйини бўлгани учун вақтида кела олмаслиги айтилаётганди. Уни келмаслиги тўғриси, яхши эмас. “Специя”да кераклигича ўйнамаяпти. Бу ерга келганида ўйин амалиётига эга бўларди. Шомуродов ўрнига ҳам футболчиларимиз бор.

Шуҳратбек Жўраев.