Ўзбекистон миллий терма жамоаси Хитойга қарши ўйин олдидан сўнгги машғулотни ўтказди

Бугун терма жамоамиз аъзолари "Guanxi Sports Center" стадионида Хитойга қарши ўйин олдидан сўнгги машғулотни ўтказишди. Бу ҳақда ЎФА расмий сайти хабар бермоқда.

Машғулот бошланишидан аввал стадионга маҳаллий футбол мактаби тарбияланувчилари келишди. ЎФА номидан уларга турли эсдалик совғалари тақдим қилинди. Шунингдек, болажонлар футболчиларимиздан дастхат олиб, улар билан биргаликда суратга тушишди.

Машғулотлар анча қувноқ кайфиятда ўтганини таъкидлаш зарур. Терма жамоа футболчилари турли қизиқарли машқларни бажариш орқали жамоавий руҳни кучайтиришга, тезкорлик ва чаққонликни оширишга интилишди.

Эслатиб ўтамиз, мусобақанинг 3-ўрни учун кечадиган баҳс эртага 25 март куни Хитойга қарши бўлиб ўтади. Учрашув "Guanxi Sports Center" стадионида Тошкент вақти билан соат 12:30да бошланади.