Ўзбекистон Шахмат федерацияси вице президенти:
Ads

Бугун, пойтахтимизда жойлашган шахмат академияси биносида “Марказий Осиё Шахмат Фестивали”га бағишланган оммавий ахборот воситалари ҳодимлари иштирокида матбуот анжумани бўлиб ўтди. Журналистлар томонидан йўлланган саволларга асосан ФИДЕ Президенти маслаҳатчиси Берик Балгабаев ҳамда Ўзбекистон Шахмат федерацияси вице-президенти Ҳусан Турдалиевлар жавоб беришди. Биз баъзи савол-жавобларни эътиборингизга ҳавола этамиз...

- Sport телеканали муҳбири: Ўзбекистонлик шахматчиларнинг савиясини қандай баҳолайсиз?

- Берик Балгабаев: Биласизми бу юрт шахматчиларининг савияси жуда юқори. Ажойиб, натижалар қайд этиб келишади. Қолаверса, менинг юртим Қозоғистон вакиллари билан ҳам кўп тўқнаш келганлиги учун бу борада ижобий фикр билдира оламан.

- UZ24.uz муҳарири: Балки ушбу турнир географиясини кенгайтириш керакдир. Чунки, ҳозир иштирок этаётган мамлакат вакилларини ҳар қандай мусобақада шахматчиларимиз мағлуб этиб келишган. Балки, Россия, хитойлик ақл гимнастикачилари билан тўқнаш келишса бизнинг спортчиларнинг савияси ҳам ошган бўлармиди?

- Ҳусан Турдалиев : Албатта кенгайтирамиз. Лекин ушбу мамлакат вакилларининг савияси борасидаги фикрингизга қўшилмаган бўлардим. Улар орасида халқаро тоифадаги гроссмейстерлар ҳам иштирок этмоқда. Жуда кучли, истеъдодли шахматчилар ҳам бор.

- Sports.uz муҳбири: Саволим аввалгисининг мантиқий давоми десак бўлади. Ҳамкасбимиз шахматчиларимизнинг савиясига урғу берди. Мен эса мазкур мусобақани нуфузига эътибор қаратмоқчи эдим. Яъни, ушбу турнир анъанавий ўтказиладиган бўлса, бутунжаҳон шахмат оламининг эътиборини тортиш учун очиқ Марказий Осиё шахмат фестивали тарзида ўтказилишини имкони борми?

- Берик Балгабаев: Албатта, шундай тарзда ўтказилиши мумкин. Аста-секин бу томонини ҳам ўйлаб кўрамиз. Бунинг учун молиявий томонини ҳам инобатга олиш керак бўлади.

- MY5 канали муҳбири: Федерация ҳамда Ёшлар иттифоқи билан бироз келишмовчилик юзага келган эди. Балки бу борада ўзингиз батафсил айтиб ўтарсиз?

- Ҳусан Турдалиев : Биласизми, ушбу ташкилот Ғарбий Осиё чемпионатига боришимиз учун ҳомийлик қилмоқчи бўлди. Лекин Ёшлар иттифоқининг бир ходими шахматчиларимизни ўзининг вакили олиб бориш борасида шарт қўйди. Биз унга у ерда мутахассис бўлиши лозим. Чунки, шунга оид ҳар-хил ҳолатлар бўлади деб тушунтирдик. У инсон эса, тушунишни ҳоҳламади ва бу борада келиша олмадик. Бор гап шу ҳолос.

- Sports.uz мухбири: Ёшлар иттифоқи билан ҳомийлик борасида келиша олмадик деб айтиб ўтдингиз. Наҳотки, Ўзбекистон Шахмат Федерацияси молиявий таъмин этадиган доимий ҳомийга эга бўлмаса?

- Ҳусан Турдалиев : Ўзбекистон Республикаси Президенти ҳузуридаги Миллий лойиҳалашиириш агентлиги бизни молиялаштириб келади. Лекин, уларнинг ҳам ўзига яраша ҳисоб-китоби бор. Баъзан шундай ҳолатлар юзага келиб туради. Яна шуни қўшимча қилмоқчиманки, биз Ёшлар Итифоқи билан орамизда хеч қандай муаммо йўқ. Уларнинг раҳбарлари билан ўзаро тушунмовчиликни ҳал қилиб олганмиз. Биз умумий ташкилот билан эмас, балки ташкилотнинг бир ҳодими билан келиша олмадик. Буни тўғри талқин қиласизлар деган умиддаман.

- Шахмат академияси мураббийи: Шундай нуфузли турнирни ёш болажонлар ўртасида ташкил қилинса янада яхши бўларди...

- Бу борада ҳам яхши режаларимиз бор. Ўйлайманки, тез орада бу ҳам амалга ошади.

- Sports.uz муҳбири: Саволим ушбу турнир мавзусидан бироз йироқ бўлсада, фурсат туғилгани учун имкониятдан фойдаланиб қолмоқчиман. Яъни, шахмат ватани Ҳиндистон эмас, балки Ўзбекистон деган маълумотлар тарқалди. Бу қанчалик ҳақиқат ва бу ФИДЕ томонидан тан олиндими?

- Биласизми, тарихчиларимиз, археологларимиз юртимиз жанубидан қадимий суякдан ишланган шахмат доначаларини топишган. Бу топилма туфайли, шундай ҳулосага келинган. Биласиз, Амир Темур бобомизнинг ўғли Шоҳруҳнинг исми ҳам шоҳ ва руҳдан олинган. Лекин бу ўз исботини топиш керак бўлади.

Аҳмадбек ЭШМАТОВ ёзиб олди.

шахмат

 

Минбар

Барча блоглар