Ўзбекистон ва Камерун терма жамоаларининг ФИФА рейтинги ва трансфер нархларидаги фарқи қандай?

23 сентябрь куни Ўзбекистон миллий терма жамоаси Жанубий Кореяда Камерун билан ўртоқлик ўйини ўтказади. Беллашув Тошкент вақти билан 11:00да бошланади.

Мазкур баҳс олдидан жамоаларнинг ФИФА рейтингидаги ўрни ва трансфер нархларидаги фарқ борасида маълумот берамиз.

Камерун терма жамоаси ФИФА рейтингида 38-ўринда бормоқда. Бу Африкадаги 5-жамоа дегани. Рейтингда эртанги рақибимиздан ўз қитъасидан Сенегал (18), Марокаш (23), Тунис (30) ва Нигерия (31) юқорида жойлашган.

Ўзбекистон эса 77-поғонани банд этган. Ҳамюртларимиз Осиёнинг айни пайтдаги ўнинчи жамоаси ҳисобланади. Қитъамизда биздан юқорида Эрон (22), Япония (23), Жанубий Корея (28), Австралия (39), Қатар (48), Саудия Арабистони (53), БАА (69), Ироқ (70) ҳамда Уммон (75) каби жамоалар жойлашган.

Трансфермаркт порталига эътибор қаратсак, Ўзбекистон миллий терма жамоасининг умумий нархи 25.95 миллион еврони ташкил қилади. Энг қиммат футболчимиз Элдор Шомуродов – 8 миллион евро (“Рома” клуби ҳужумчиси). Терма жамоадаги трансфери энг арзон вакилимиз Ботирали Эргашев – 350 минг евро (АГМК дарвозабони).

Камерунда бу кўрсаткич анча яхши. Уларнинг айни пайтдаги умумий нархи деярли 155 миллион еврога баҳоланган. Терма жамоанинг энг қиммат футболчиси Мбеумо Брян – 25 миллион евро (Англиянинг “Брентфорд” клуби ҳужумчиси). Энг арзон футболчи Симон Нгапандуэнтнбу – 400 минг евро (Франциянинг “Марсель” клуби посбони).

П/С. Трансфермаркт порталидаги терма жамоалар рўйхатида айрим ўзгаришлар бор. Масалан, Ўзбекистон МТЖ рўйхатида Ҳожимат Эркинов ўрнига Достон Ҳамдамов турибди (қолганлар ўз ўрнида). Рақибимизда ҳам шундай кичик хатоликлар бор.