Ўзбекистонлик жангчи ONE FC билан шартнома имзолади. Дебют жанги санаси ва рақиби маълум

Юртимиз ММА оламида тобора ўз ўрнига эга бўлиб бораётган оғир вазн тоифасидаги вакилимиз Жасур Мирзамуҳаммедов жаҳоннинг нуфузли промоушени билан шартнома имзолади. 

У 20 май куни Сингапурнинг ONE FC промоушенида дебют қилади. "ONE FC 157" турнири доирасида бўлиб ўтадиган ушбу жангида ҳамюртимизга бразилиялик Маркус Алмейда рақиблик қилади. 

Аслида, Алмейда ватандоши Хюго Гуннага қарши жанг қилиши лозим эди. Бироқ, баъзи сабабларга кўра, Гунна ушбу тўқнашувда иштирок эта олмайдиган бўлди ва ташкилотчилар унинг ўрнини юртдошимиз билан тўлдирди. 

Шу тариқа Жасур Мирзамуҳаммедов жаҳоннинг кучли уч промоушеннинг бири сифатида эътироф этилувчи ONE FC вакилига айланди.

Маълумот учун, Алмейда профессионал фаолияти мобайнида 2 та жанг ўтказган ва ҳар иккисида ғалабага эришган. Ҳамюртимизнинг кўрсаткичи эса 5 та жанг ва 5 та ғалабадан иборат.