Ўзбекистонлик яна қайси жангчилар UFCда фаолият юрита олади? Мутахассислар жавоб берди

ММА оламидаги энг нуфузли UFC промоушенининг назарига тушишнинг ўзи бўлмайди. Албатта, бу промоушенда жаҳоннинг энг кучли жангчилари йиғилган. Улар орасида эса юртдошларимиз борлиги янада қувонарлидир. Ҳа, UFCда бугунга келиб, уч нафар ҳамюртимиз ўз жангларини ўтказаяпти. Жумладан, Маҳмуд Муродов бу промоушендаги илк вакилимиз бўлди ва учта жангнинг барчасида ғалабага эришди. Зарруҳ Адашев эса стартни бироз муваффақиятсизлик билан бошлади. Шунингдек, Лилия Шакированинг дебюти ҳам омадсиз чиққанлигини яхши биласиз. Албатта, мағлубиятларнинг ҳам ўзига яраша сабаблари бор ва ўйлаймизки, ҳар учаласининг кейинги фаолияти омадли тарзда давом этади.

Бежизга бу мавзуда сўз юритмадик. Сабаби, бугун биз  мутахассислардан UFC промоушенида юқоридагилардан ташқари ўзини кўрсата оладиган яна уч нафар жангчимиз сирасига кимларни қўшиши борасидаги савол билан мурожаат қилдик. 

Жаҳонгир Қорабоев - мураббий

- Бундай жангчиларимиз жуда кўплаб топилади. Агар, учталикка тўхталадиган бўлсак, Музаффар Ражабов, Аҳлиддин Мирзадавлатов ва Авлиёхон Ҳамидовни айтиб ўтишим мумкин.

Отабек Мусаев - Ўзбекистон ММА ассоциацияси ҳакамлар кенгаши раиси

- Жаҳонгир Жумаев, Олим Нормуродов ҳамда Авлиёхон Ҳамидовнинг имкониятларини юқори баҳолаган бўлардим. 

Фарруҳ Мадаминов - мураббий

- Жуда кўп спортчиларимиз бор. Тўғри, UFC чемпиони бўла олади, дейишга шошилмайман. Лекин йўқолиб ҳам қолмайди. Ҳар бир вилоятимизда кучли жангчилар бор ва шунинг учун ҳам аста-секин рақобат кучайиб, яхши савиядаги жангчилар етишиб чиқмоқда. Ҳеч бирини хафа қилгим йўқ. Бироқ Нурсултон Рўзибоев, Аҳлиддин Мирзадавлатов ва Авлиёхон Ҳамидов ҳозирда ҳам ушбу промоушенда бемалол ўз ўрнини топиб олади. Албатта, бу менинг шахсий фикрим. 

Ҳожиакбар Ҳакимов - Ўзбекистон К-1 федерацияси Тошкент шаҳар бўлими раиси 

- Авлиёхон Ҳамидов ҳамда Нурсултон Рўзибоевни айтган бўлардим. Қолганларга бироз тажриба керак назаримда…

Нурали Бакирдинов - собиқ спортчи (ACB ҳамда Alash Pride промоушенидаги ўзбекистонлик илк жангчи)

- Албатта, ҳамманинг бу борада  ўз шахсий фикри бор. Мени назаримда Амин Эргашев, Сирожиддин Эшонбоев ва Аҳлиддин Мирзадавлатов ҳам бу промоушенда ўзларини кўрсата олади. 

 Суҳроб Рўзиматов - Ўзбекистон К-1 федерацияси бош котиби

- Бобур Тагиев, Мавлуд Тифиев ҳамда Анвар Бойназаровни айтиб ўтишим мумкин. Тўғри, булар асосан муайтайнинг профессионал йўналиши ҳамда К-1 да жанг қилиб келишади. Анвар эса, ММАдаги фаолиятини бошлаб юборди. Бобур ҳамда Мавлуд ҳали бу йўналишда ҳаракат қилмаган бўлса ҳам, уларнинг салоҳияти етади, деб ўйлайман.

Сардор Раҳимов - журналист

- UFCда жанг қилишнинг ўзи бўлмайди. Шундай бўлса-да, Жаҳонгир Жумаев, Нурсултон Рўзибоев ҳамда Азамат Нуфтиллаевнинг маҳорати мазкур промоушенда фаолият олиб боришга етади.

Фаррух Муҳиддинов - блогер

- Кучли  жангчиларимиз исталганча топилади. Бироқ улар орасида Нурсултон Рўзибоев, Авлиёхон Ҳамидов ва Жаҳонгир Жумаевнинг бу промоушенда ҳам яхши жангларни ўтказишга имкониятлари етади. Албатта, бу менинг шахсий фикрим!

Жасур Алижонов -мураббий

- Айни кунда Нурсултон Рўзибоевни айтишим мумкин. Насиб қилса, қолганлар яқин 1-2 йилда етишиб чиқади.