Ўзбекистоннинг бўлажак рақиби Жаҳон чемпионати ғолиблигига асосий даъвогар сифатида кўрсатилди

Аввалроқ 2014 йилги Жаҳон чемпионатида Германия, 2018 йилги мундиалда Франция ва 2022 йилги турнирда Аргентина ғолиб бўлишини аниқ башорат қилган немис иқтисодчиси Йоахим Клемент "ЖЧ-2026" ғолибини ҳам маълум қилди.

Мутахассиснинг фикрича, бўлажак Жаҳон чемпионатида Нидерландия терма жамоаси зафар қучади. Унинг тахминига кўра, финалда нидерландлар Португалияни мағлуб этади.

Клемент ўз тахминларига ҳам изоҳ бериб ўтди:

"Биринчи марта Германия Бразилияда Жаҳон чемпионлигини қўлга киритганида ҳайратда қолганман. Чунки ўша пайтда деярли барча экспертлар Европа жамоаси Жанубий Америкада ҳеч қачон мундиалда ғолиб бўлмаганини таъкидлаётганди.

Бу мутлақо иррационал ёндашув. Бу худди лотерея ўйнаганга ўхшайди. Мен ҳар доим шундай дейман: агар кимдир менинг Жаҳон чемпиони ҳақидаги прогнозимга асосланиб пул тикса, унга энди ҳеч нарса ёрдам бера олмайди.

Бу танга ташлашга ўхшайди. Сиз танга тўрт марта кетма-кет бир томони билан тушишини башорат қилишингиз мумкин ва бу рўй бериши ҳам эҳтимолдан холи эмас. Аммо бу кейинги сафар ҳам албатта такрорланишини англатмайди".

Манба маълумотига кўра, Клемент модели мамлакатнинг аҳоли сони, аҳоли жон бошига тўғри келадиган ЯИМ ҳажми, футболнинг мамлакатдаги ўрни, миллий жамоанинг жаҳон рейтингидаги ўрни ҳамда омад факторини ҳисобга олади.