Ўзбекистоннинг энг яхши ҳаками "Насаф" ва "Андижон" учун қанчалик омадли?

Маълумки, Суперлиганинг илк туридаги “Насаф” – “Андижон” қарама-қаршилигида бош ҳакам вазифасини Вадим Агишев бошчилигидаги ҳакамлар бригадаси бошқариб боради. Билсангиз, Агишев 2022 йилда Ўзбекистоннинг энг яхши ҳаками деб эътироф этилган. Хўш, ўтган йили “Насаф” ва “Андижон” иштирокидаги нечта ўйинларда ҳакамлик қилган?

Қизиғи, 2022 йилги чемпионатда Агишев “Насаф”нинг иккита учрашувини бошқарган ва ҳар иккиси ҳам “Навбаҳор”га қарши ўйинларда юз берган. Дастлаб 14-турда Қаршидаги “Насаф” – “Навбаҳор” (0:1) ўйинида ишлаган бўлса, кейин Бухородаги Ўзбекистон Кубоги финалида ҳам мазкур клублар иштирокидаги баҳсда ҳакамлик қилган ва унда “Насаф” 2:1 ҳисобида ғалаба қозонган.

2022 йилги мавсумда Агишев про лигада “Андижон” қатнашган ўйинларни бошқармаган. Унинг “Бургутлар” иштирокида бошқарган охирги ўйини 15-тур доирасида “Сурхон”га қарши кечган бўлиб, ўшанда мезбонлар 2:0 ҳисобида ғалаба қозонган. Қизиғи, ушбу клубларнинг биринчи даврада Андижондаги чемпионат очилиш учрашувида ҳам ҳакамлик қилган ва унда майдон эгалари 1:0 ҳисобида ғолиб чиққан. Шунингдек, “Андижон” – “Локомотив” (1:2) ва “Андижон” – ОКМК (2:3) учрашувларида ҳам бош ҳакамлик қилган.

Кўриб турганингиздек, бир ярим йилдан сўнг Агишев “Андижон” ўйинида ишлайди. Эслатиб ўтамиз, ўтган мавсум якунлари бўйича айнан Вадим Агишев Ўзбекистоннинг энг яхши ҳаками деб эътироф этилган.